“MOUNDANG na unta ko sa pagpalansang pero gipadamgo man ko ni Jesus nga ayaw og hunong.”
Mao kini ang giasoy sa Superbalita Cebu ni Gilbert Bargayo, 59, taga dakbayan sa Carcar, kinsa mapalansang na usab sa krus sa ika-27 ka higayon karong Biyernes Santo, Abril 19, sa lungsod sa Tuburan.
“Medyo edaran na unta ‘ta pero dunay kanunay maghunghung nako pinaagi sa damgo,” matod ni Bargayo, kinsa mosulod na sa pagka senior citizen sa sunod tuig.
Hinuon, si Bargayo nagkanayon nga maayo ang iyang panglawas ug makasagubang sa kasakit sa paglansang sa iyang duha ka mga tiil ug mga kamot sa krus ubos sa naglagiting nga kainit sa adlaw.
Si Bargayo nagkanayon nga wala siya masayod kon unsay ipasabot sa iyang damgo apan, alang kaniya, ang iyang pagpalansang sa krus usa lang ka linawas nga pasundayag sa nahiagom ni Kristo sa krus aron pagluwas sa kasal-anan sa katawhan.
“Ordinaryo man lang ko nga tawo. Wala ko magpatuo nga milagruso ko. Linawas lang ni nga pasundayag aron mas masinati sa mga tawo nga namalandong sa kaamtayon ni Kristo." pagpasanot ni Bargayo.
Niadtong una, natuman ang iyang saad nga makatukod og kapilya sa Guadalupe, Carcar gikan sa mga halad sa iyang nahipos sa pagpalansang sa krus.
“Aw mao lang gihapon, atong ayuhon ang kapilya,” dugang ni Bargayo gikan sa iyang madawat nga donasyon karong Biyernes Santo.
Matod ni Bargayo, ang iyang pagpalansang sa Tuburan ugma maoy ikapito nga sunodsunod nga tuig sa Tuburan ubos sa pag-sponsor ni Mayor Democrito ‘Aljun’ Diamante.
Dugang ni Bargayo, ang lokal nga kagamhanan sa Tuburan nakabenepisyo sa iyang paglansang sa krus human nakadapit og mga lokal ug langyaw nga turista o mga kuryusong tawo.
Mapasalamaton siya kang Diamante nga kanunay nipaluyo sa iyang pagpenetensiya.
Naila ang Tuburan sa ilang maanindot nga beach, suba ug falls nga nag-unang dugokan sa mga turista labi na ning panahon sa taas nga bakasyon sa Semana Santa. (RRM)