LAHI sa naandan sa ubang mga parokya sa Archdiocese sa Sugbo diin mga alagad sa simbahan maoy pilion nga modala sa papel nga disipulo ni Hesus.
Ang Archdiocesan Shrine of San Roque sa Barangay Mambaling, siyudad sa Sugbo mga miyembro sa fraternities ang hugasan sa ilang mga tiil karong adlawa, Huwebes Santo, Abril 18.
Si Padre Mhar Vincent Balili, parish priest, niingon nga 12 ka mga miyembro sa Alpha Kappa Rho International Fraternity and Sorority (Akrho), Tau Gamma Phi, ug Beta Phi Sigma ang hatagan og higayon nga modala sa maong papel atol sa dramatization sa katapusang panihapon ni Hesukristo.
Matod niya karong tuiga ang mga miyembro sa fraternities ang iyang gipili kay kadaghanan niini wala makasuway nga na-evangelize.
“Ang society ba naa bitay murag phobia og fraternities nga mga bugoy kaayo bitaw. Pero Kristiyano man na sila pud. Dili bitaw ta mahadlok nila pag-evangelize,” pasabot ni Balili dihang nahinabi sa Superbalita Cebu.
Karong tuiga, gisaulog sa mga simbahang Romano Katoliko ang tuig sa kabatan-onan diin naghinangat ang National World Youth Day karong Abril 23 hangtod sa Abril 28 diin ang Sugbo maoy host sa dakong kalihokan.
Sigon ni Balili nga pagsanong usab kini sa panawagan sa Santo Papa sa kaparian nga adtuon ug sangyawan ang mga tawo nga layo sa simbahan.
“Mao man nay giingon ni Pope Francis nga go to your peripheries. These are the people nga gibalikbalik bitaw nato nga we have to evangelize the lost, the least, and the last. Naa man tay bias ani nila mao nang dili nato sila apilon pero mga Kristiyano baya na sila,” dugang pa sa pari.
Sumala ni Balili, matag buwan, magtagbo ang mga miyembro sa fraternities ug lesbian, gay, bisexual, transgender (LGBT), senior citizens ug mga drayber og habalhabal sa ilang parokya alang sa ilang special apostolate.
Sa unang adlaw sa Lunes matag buwan, naay misa sa parokya alang sa maong mga sektor aron magiyahan sa ilang espirituhanong kinabuhi ug di mahisalaag sa dautan. (B)