GIPANIGURO sa kapulisan sa Davao Region nga andam sila sa ilang tahas nga hatagan og seguridad ang katawhan sa rehiyon, ilabi na karong Semana Santa.
Sa sulat pamahayag ni Police Brigadier General Marcelo Morales, regional director sa kapulisan, gibutyag niini nga naka-deploy na ang halos tanang tropa sa kapulisan sa rehiyon alang sa maong tahas.
Gisiguro sa kapulisan nga hugot ang seguridad nga gipatuman sa mga lugar sa rehiyon nga dagsaon sa katawhan.
Hugot usab nilang bantayan ang mga simbahan ug mga lugar kun asa magtapok ang mga tawo aron masiguro nga luwas kini batok sa mga terorista.
Sa Davao City, gibutyag ni General Morales nga padayon ang "no backpack policy" sa mga lugar kun asa dunay tapok o tigum sa mga tawo, ilabi na sa kasaulugan sa Semana Santa.
Ang Davao City Police Office nag-deploy na sab sa ilang mga sakop sugod niadtong Martes sa hapon pinaagi sa usa ka send-off ceremony.
Mas hugot usab ang seguridad nga ginapatuman sa mga terminals sa siyudad ilabi na sa Davao City Overland Transport Terminal (DCOTT).