10 nag-basketball, gipang-priso

GIPANG-PRISO ang napulo nga nagdula og basketball human masakpan sa pulis nga nagpustahanay og kuwarta.

Subay sa blotter nga natala sa Sta. Ana Police Station gikasa sa otoridad ang anti-illegal gambling operation sa Alzate Extention Street, Barrio Obrero Davao City Martes sa hapon, Abril 16.

Dihang nasuta sa mga pulis nga nagpustahanay gilayong gipangkarga sa mobile patrol sila Rocky Cabunoc, 26-anyos, Jerico Antonares, 31-anyos, Marjun Maynapus, 31-anyos, Chadie Tumbiga, 31-anyos, Nelson Lazada, 50-anyos, Joselito Diez, 29-anyos, pulos mga traysikad drayber ug laing tulo nga sila Romel Alindao, 28-anyos, Edgar Matabaran, 45-anyos ug Arnel Valdez, 41-anyos, pulos nagpuyo sa dapit.

Sumala sa kapulisan nga ilang naaktuhan nga nagsugal ang mga nahisgutan pinaagi sa pagpusta og salapi sa ilang pagdula og basketball.

Narekober sa kapulisan ang P200 nga pusta ug usa ka bola diin ang mga dinakpan mag-atubang og kasong pagsupak sa Presidential Decree No. 1602 kon Illegal Gambling Law.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph