WALA pa mailhi nga lalaki kansang ulo ang giputos pa sa yellow plastic ang napalgan na nga patay diha sa daplin sa dalan sa may Sitio Capasanan, Barangay Casili, dakbayan sa Mandaue, niadtong gabii sa Biyernes Santo, Abril 19.
Mga samad pinusilan sa iyang ulo ug sa dughan ang naangkon sa biktima.
Matud ni Police Colonel Julian Entoma, ang director sa Mandaue City Police Office, nga nadawat nila ang alarma kalabot sa napalgang patay nga lalaki niadtong alas 11:50 sa gabii sa Biyernes.
Ang lalaki gibana-bana nga anaa sa pangidaron nga 30 ngadto sa 35 anyos ug aduna kini gitas-on nga 5'5, medium built ang lawas, nagsuot og puti nga t-shirt, maong pants, ug puti nga rubber shoes.
Sa iyang walang kamot anaa kini silver ring nga adunay diamond, usa ka gold ring, ug silver bracelet.
Nakuha diha duol sa patay'ng lawas ang unom ka mga kabhang sa bala sa 45 kalibre nga armas.
Sa gihimo nga inisyal nga pakisusi sa kapulisan, giingon nga ang mga nanagpuyo duol sa dapit ang nakadungog og tulo ngadto sa upat ka buto-buto sa armas pasado alas 10 sa Biyernes sa gabii.
Usa ka motorsiklo ug nag-awto ang nadunggan sa mga residente sa lugar human sa buto-buto sa armas.
Hinungdan nga nagduda ang mga pulis nga posibleng gi-pick-up o kaila sa biktima ang mga responsable sa pagpatay niini, ug naa sa maong lugar ra kini gi-salvage.
Hangtud pasado ala 1 Sabado sa hapon, wala pa nailhi sa mga pulis sa biktima.
"Patay gyud ang tuyo kay wala man sad gipangkuha ang iyang mga jewelry," asoy ni Entoma sa Superbalita Cebu.
Kasamtangan nga anaa sa St. Francis Funeral Parlor sa dalan N. Bacalso sa dakbayan sa Sugbo ang patay nga lawas.