DUL-AN tunga na sa kinatibuk-ang mga barangay sa dakbayan sa Sugbo ang apektado sa nagpadayon nga pagnihit sa tubig sa Metro Cebu subay niining huwaw.
Sa labing uwahi nga datus sa Metropolitan Cebu Water District (MCWD), niabot na sa 32 ka dapit o barangay sa dakbayan sa Sugbo ang wala'y agas o minus ang oras sa agas sa ilahang mga gripo.
Lakip niini ang Barangay Guadalupe, ilabi na sa Horseshoe Drive ug pipila ka parte sa Banawa; Capitol Site, ilabi na ang mga dapit sa Oprra, Ipil-Ipil, Clavano ug Juana Osmeña; Kamputhaw, Sambag 1, Sambag 2, Bulacao, Inayawan, Cogon Pardo, Poblacion San Nicolas, Basak Pardo, Quiot, Mambaling, Duljo-Fatima, San Nicolas Proper, Sawang Calero, Suba, Pasil, Pahina Central, Kalubihan, Ermita, Calamba, Zapatera, Day-as, San Antonio, Tejero, T. Padilla, Parian, Kamagayan ug Labangon, ilabi na ang mga dapit sa Katipunan ug Salvador Extension; Pier area, North Reclamation Area ug N. Bacalso Avenue.
Matod sa tigpamaba sa MCWD, Charmaine Rodriguez- Kara, nga nagpadayon ang ilahang pag rasyon sa tubig sa maong mga dapit pinaagi sa paghatag og tubig gamit ang mga trucks.
Samtang gigamit na sa MCWD ang ilahang Mobile Siphon Tank sa bukirang barangay sa siyudad sa Sugbo aron makahatag kini og tubig sa mga residente.
Ang maong mobile siphon tank adunay kapasidad nga 1,200 cubic meters matag adlaw.
Gigamit kini human sa bagyong Yolanda sa isla sa Bantayan ug sa mga bukirang barangay sa dakbayan sa Sugbo diin mao kini ang mo-treat sa tubig aron magamit kini.
Anaa kini gibutang sa Buot River sugod ning buwana diin makapahimulos ang mga barangay sa Taptap, Adlaon, Babag, Sirao, Malubog ug Pung-ol.
Mamahimong mokuha og tubig ang mga residente sa maong tangke sugod alas 9 sa buntag hangtod alas 4 sa hapon ug libre kini.
Wala hinuon gitambagan ang mga mogamit niini nga moinom kini sa maong tubig.