GIHULAGWAY sa mga hepe sa siyudad ug probinsya sa Sugbo nga malinawon sa kinatibok-an ang pag- handom sa mga Katoliko sa Semana Santa nga walay mga insidente nga natala.
Nakita ni Police Colonel Manuel Abrugena, hepe sa Cebu Provincial Police Office (CPPO), nga midagsa ang mga tawo sa probinsya sama nalang sa isla sa Bantayan nga gi dayo sa mga local ug langyaw nga turista.
Gikan sa pagsugod sa solemn procession sa simbahan sa lungsod sa Santa Fe sa isla sa Bantayan hangtod nga nahuman ang relehiyosong kalihukan, wala biyae sa Philippine National Police (PNP) ang pagbantay.
Naila ang isla sa Bantayan nga mag fiesta panahon sa mahal nga adlaw ug gihatagan silag pagtugot nga mangaon og karneng baboy.
Sa mga dagkong simbahan nga adunay kalihukan sa mahal nga adlaw, gipatutokan ni Abrugena nga maoy hinungdan nga hapsay ug nagmalinawon ang Semana Santa.
“Generally peaceful naman po ang celebration ng ating Semana Santa 2019. Except for some isolated crime incidents, our security plan has been proven effective,” matod ni Abrugena.
Bisan naka-leave, si Police Colonel Royina Garma, hepe sa kapulisan sa siyudad sa Sugbo, padayon sa iyang monitoring sa deployment sa iyang mga sakop.
Matod niya sukad niadtong Miyerkules Santo, Abril 17, 100 percent nga naka duty ang mga police.
“Generally peaceful, walang major incident. The usual crimes committed in ordinary days lang,” matod ni Garma.
Nagbutang usab si Garma og mga pulis sa mga dagkong simbahang Katoliko atol sa Sugat sa pagka banhaw karung Dominggo sa kadlawn, Abril 21, sama sa Archdiocesan Shrine of our Lady of Guadalupe.
Gipaniguro ni Garma nga walay mga dautang elemento nga maka biktima sa mga tawo nga mitambong sa Sugat sa pagka banhaw.
Gipangandaman sad sa kapulisan ang pagdagsa sa mga tawo sa mga kaligoanan sama sa beach resort karung Dominggo de Gloria, Abril 21.(AYB)