SECTIONS
Friday, July 19, 2019
PAMPANGA

Garcia: Duminggu ning Pamanyubling Mye nang Yesukristo (Easter Sunday)

Kapisik

King mumunang aldo ning paruminggu, binang maranun king abak,

ding kababaynan kinangwa lang sangkut a inadya da at mine la king kutkutan.

Ikit dang ing batu dinugang yang makarayu king kutkutan, dapot inyang lungub la, e de ikit ing katawan nang Ginung Yesus.

Kabang pangasdanan da ing dikil kaniti, bigla da lang ikit siping da ring adwang lalaking kikinang imalan anting kildap.

King takut da, ding babai dinuku da la ring lupa da king gabun,

dapot ding lalaki ngara karela, “O ba’t pantunan ye ing maybe karing mengamate?Ala yu keni; sinunli neng mebye! Tandanan yu ing sinabi na kekayu, kabang ati yu pa king Galileya:

“Ing Mambang ning Tau sukat yang miyatad karing gamat ding makalsalanan,

mipaku ya at king katlung aldo subli yang mye.” Kanita aganaka da ing amanu na.

Inyang mibalik la king kutkutan, sinabi da ngan ing bage a reti karing labing-metung at karing sablang aliwa pa.

I Marya Magdalena, i Dyowana, Marya--ing indu nang Yesus,

at ding aliwang abe ra a sinabi kaniti karing apostoles na.

Dapot e da la penwalan ding kababaynan,

uling para karela ding amanu da ala lang mula-mula.

I Pedru, naman pala, tinikdo ya at mamulandit ya king kutkutan. Bikle neng bagya ing katawan na, at menakit yang gising ulas a pakasalbag dili ra, at meko yang parayu, isipan na king sarili na nung nanung milyari.”

~Lukas Dangka 24: Sunis 1-12

(Luke 24:1-12)

***

Milabas na naman ing Maleldo bukas, kabalen. Makanyan man, e ta ya pasayangnan ing aldo iti ba’ta yang apiganakan ing pamanyubli nang mye ning Panginwang Yesukristo. Ken nang aliwang aldo ing pamanawe at pamanyungab king bebe dagat o swimming pool. Ibye ta ne man pa ing aldo iti bang aganaka tamu ing bye alang-angga.

Sukat tamung tumula at milako takut king kamatayan uli ping e ne man alang-angga iti nung e ing bye tamu ala yang angga tagana. Mu pin, nung e ta ya gamitan king makatakda nang sangkan—masayang mu ing pangabait tamu keti king yatu anting tau. Ing tau mu kasi yang ating pamikatagun at upaya bang akilala ne ing Dyos at abalu na nung makananu ing bye alang-angga.

E naman buri na’sabyan nita dapat tamung manalbe salubung at pamanintun Ebung Maleldo o “easter egg” at pamanalbe king pamipakbung kang Udas. Sukat ta’ng pantunan at apakibalwan ing nung makananu tamung abalu ing pamanmunta king kayaryan ning ibpa.

Saguli mu ing pamanuli banwa nung tukyan tamu ing utus nang Ginung Yesukristu. Iti ing “Luguran Ya ing Ibpa king mabilug a pusu, isip at mabilug a pangatau.” Katuki niti ya pin ing kadwa, “Luguran la ring aliwa nti king pamaglugud tamu karing sarili tamu.” E malyaring muna ya ing kadwa at kadwa ya ing mumuna nung makananung e ya malyaring mumuna ya ing kabayu king kalesa.

Bakit antita? Kasi e ta la malyaring aluguran deng aliwa nung e tamu balu ing nung ninu ing Dyos at nung nanu at ninu tamu. Para abalu taya ing Dyos dapat dalise tamu pusu uling bulag tamu king katutwan ning Dyos nung e ta’dalise pusu o pilubluban. Makananu? Igale la’t idalit ding Nwan a Lagyu ning Ginu.

“Ikabus mu ku, Ginu, kapamilatan ning Lagyu Mu.”~Dalit 54:1

***

Dake Talabaldugan:

1. gugò/gugù – (palagyu) pamaglinis king bwak gamit ing danum o aliwang sangkap paglinis. English: Entada phaseloides: a large tree with thick, angled and much twisted stems, dark brown and rough bark (source of natural shampoo), with big curbed pods containing hard round seed known as bayugo. Alimbawa king pamangamit: “Danum apong gugu ing paglinis da bwak deng mangatwa kanita dapot ngeni mibabalik na naman.”

2. gugol/gugul – (palagyu) gamit ding salapi. English: expense, expenditure. Alimbawa king pamangamit: “Isingil mu ing gugul mu karing menatagan keng pabasa at e king pisamban.”

3. guguling – (palagyu) gusi, malating tapayan. English: small jar or vase with many colors and intricate design. Alimbawa king pamangamit: “Menabu ya keng awing itang guguling nang Tsuling inya uyta mengaspak ya’t mengalasilasi.”

4. guguntíng – (palagyu) durun, balang, tipaklung. English: locust-like animalcule. Alimbawa king pamangamit: “Darakal la reng gugunting bayu pa dating ing papalut inya sukat lang banten bayu da pa gisanan ngan ing pale.”

5. gulà/kagulan– (palagyu) kaligaligan ning diwa. English: spiritual anxiety or uneasiness during our earthly life expected to be released when the soul is liberated into the spiritual dimension. Alimbawa king pamangamit: “Ing mabayat at masikan tamung gula yang sangkan inya e ta patugut mantun paralan bang ligaya tamu.”

***

Gawing Mekalingwan Karing Kapampangan

Sadya balang Duminggu ning Subling-mye at Salubung dakal la pang magtindang baruya a gawa keng tapung at makipalaman a balatung at ungut a meyumwan. Mamisali la namang okoy a gawa keng kamuti at deng aliwa atin lang samut a kulubasa. Ngeni, pane na lang mag-fast food stores deng tau kareng kabalenan da o kareng malls a makakalat keng lalawigan. Misane na la panglasa keng apapangan da inya nung pakanan mu lang baruya at okoy ditak na lang makiburi.

***

PAMIPALINO: Ing Kapisik magnasa ya at manwalang misubling pasibayu ing lagablab ning legwan ning Kalinangan Kapampangan kapamilatan ding keyang dalit, kawatasan, amlat at miyayaliwang kapaglalangan-panyulat a misulat king pigmulan at tune kulitan kambe ning dalise at mapagmasabal a pamisip at parasan.

Ing panyulat ding pipumpunan yang sukat mataluki at miparangalan kapamilatan ning pamangamit kareti at aliwa ring karing dayu at salungat a paralan dang dela keti Kapampangan. Ing Kapisik ala yang kikilingan a kapanaligan, aguman o ninu man nung e ing Lubusang Katutwan.

Malyaring sumulat king garciakragi@yahoo.com para karing kutang o munikala.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph