MIPABAHA og 33 puntos si Russel Westbrook nga gilamasas og 11 ka assists sa dihang gibawsan sa Oklahoma City Thunder ang Portland Trail Blazers, 120-108, kagahapon sa Game 3 sa ilang first round best-of-seven playoffs sa Eastern Conference National Basketball Association (NBA).
Midugang og 22 puntos si Paul George, 18 ang natampo ni Jerami Grant ug 17 gikan usab ni Dennis Schroder alang sa Thunder kinsa mao gihapoy mo-host sa Game Four ugmang adlawa.
Hinuon, pabilin ang Blazers nga nag-una sa series, 2-1. Si Damian Lillard mihagpat og 32 puntos, 25 niini sa third quarter, apan igo lang siya nakapugnit og tres sa fourth.
Gisirado sa Oklahoma ang second quarter, 10-1, aron sakmiton ang bintaha, 49-39, diin si Lillard nalimitahan ngadto sa kuwatro puntos lang.
Human mabiyai og 15 puntos, ang Blazers nakasikit og nakapanghulga pa sa Oklahoma City, 86-82, sa dihang nanginit ang mga kamot ni Lilliard. Ang tress ni McCollum maoy nagtabla, 89-89, sa sayong bahin sa fourth quarter.
Apan nahibalik sa pagkontrol sa duwa ang Thunder ug ang long two ug tres ni Westbrook sa katapusang 1:20 segundos maoy nag-inat sa ilang labaw ngadto sa 14 puntos hangtod nga hingpit nasilyo ang kadaugan.
Samtang didto sa Indiana, mitikang paduol ngadto sa sunod round ang Boston Celtics human, sa ikatulong sunodsunod nga higayon, ila na usab nga nabuntog ang host Indiana Pacers, 104-96 aron iposte ang 3-0 nga bintaha sa first round series.
Mahimong tapuson na ugmang adlawa sa Celtics ang serya didto mismo sa Indianapolis.
Si Jaylen Brown mikulit og 23 puntos, midugang og 19 si Kyrie Irving nga gibuwakan og 10 ka assists ug lima ka rebounds.
Kini maoy ikaunom nga sunodsunod nga pildi sa Pacers ngadto sa Celtics sa regular season ug sa playoff.
Si Tyreke Evans mitali og 19 aron pangulohan ang Pacers, samtang si Bojan Bogdanovic aduna usay 15 puntos.
Ang 10-4 nga rally maoy nahimo nilang likoanan paingon sa kadaugan. Sa first quarter pa lang gani, nakapabuhagay gilayoon og napulo ka tres ang Celtics.
Ang Toronto Raptors sa ilang bahin, misandig usab sa 30 puntos ni Pascal Siakam kinsa milangkat usab og 11 ka rebounds, Kawhi Leonard nga mitapos sa duwa nga may 16 puntos aron patapsingan ang Orlando Magic, 98-93, aron sakmiton ang bintaha sa ilang Eastern Conference first round series, 2-1.
Si Terrence Ross nangulo sa Orlando nga may 24, ug Nikola Vucevic kinsa bugnaw nga nakasugod, mitapos sa duwa nga may 22 puntos ug 14 ka rebounds.
Ang Game Four duwaon ugma didto gihapon sa korte sa Orlando.
Nabiyaan ang Raptors, 61-60, sa tungatungang bahin sa third quarter, apan ang pagpahagsa og 16-0 nga rally niini maoy nahimong giya kanila.
Karong adlawa, (alas tres sa kadlawon sa Pilipinas), suwaya sa Philadelphia Sixers pagpabukad ang ilang labaw sa series sa dihang ila na usab sulngon ang Brooklyn Nets. Sa kasamtangan, ang Sixers naghupot sa 2-1 nga bintaha.
Hugot nga kombati usab ang gipaabot nga masaksihan ang Game Four tali sa second-seed Denver Nuggets ug sa seventh-seed San Antonio Spurs sa alas 5:30 sa buntag dinhi sa Pilipinas.
Ang Spurs, sa pagkakaron, maoy nag-una sa series, 2-1. Ang Milwaukee Bucks, 2-0, makigsangka sa Game 3 batok sa Detroit Pistons, samtang ang Houston Rockets, 2-0, mohimamat na usab sa Utah Jazz sa alas 10:30 karong buntag. JBM