MIDAGAN og lima ka adlaw ang pagpahuway sa PBA tungod sa pagsaulog sa Semana Santa.
Ug kining mga adlawa, gipahimuslan sa San Miguel Beer ug Phoenix Pulse aron makakuha usab sila og insaktong enerhiya nga ilang magamit karong gabii sa paghibalik sa semifinals round sa Philippine Cup.
Ning Dominggo de Glorya o Easter Sunday, magsangka na usab ang Beermen ug ang Fuel Masters alang sa Game 3 sa best-of-seven series sa Araneta Coliseum.
Dala ang bintaha human mopatigbabaw sa unang duha ka panag-engkuwentro, ang defending champion SMB mosuway pagbingat sa ilang labaw ngadto sa 3-0, butang nga lisod na kaayong maapsan.
Sa kasaysayan sa 43 ka tuig sa PBA, bugtong ang San Miguel lang ang nakabangon gikan sa 0-3 nga biya sa series sa dihang ilang gipukan sa championship series ang Alaska Aces niadtong 2016 nga edition ning maong conference.
“It’s practically a do-or-die game for them,” matod ni Beermen coach Leo Austria sa dihang gikahinabi sa PBA.ph.
Kini human nila mapildi ang Phoenix, 92-82, sa niaging Lunes sa ikaduhang sunodsunod nga higayon. Una kini nilang gipukan sa opening match sa serya, 100-88.
“They know that to be down 0-3, it would be very hard to come back. We should be really focused for our next game,” dugang ni Austria.
Dili gusto ang Beermen nga masinati nila ang nahiaguman ang nahitabo sa Alaska.
“Ayaw naming mangyari sa amin ‘yun. ‘Yun ‘yung lesson learned. Ayaw naming mangyari sa amin ‘yun,” padayag sa beteranong Beerman nga si Arwind Santos.
“Hangga’t maaari, i-derecho namin ‘yung magandang ginagawa namin, ‘wag kami makalimot.”
Gitutokan karon og maayo sa Phoenix ang ilang depensa.
Sa opening game, ilang nalimitahan ang higanting sentro sa San Miguel nga si June Mar Fajardo ngadto sa nuebe puntos lang, apan sa Game Two nakabawi ang Sugboanong five-time MVP ug mikutlo kinig 19 puntos ug 18 ka rebounds.
Ug naa usab sila si Marcio Lassiter ug Alex Cabagnot nga nag-average og 19 ug 17 puntos matag duwa maoy laing naghatag og labad sa ulo ni coach Louie Alas. Kini gawas pa nila ni Terrence Romeo ug Santos.
Sa series, sa unang duha ka duwa ang Phoenix adunay 35 porsiyento sa field goal kon itandi sa 43 porsiyento sa SMB.
Hinuon nakapapugos sila sa Beermen sa pagkomiter og 41 ka turnovers, pero sila sab adunay 42.
Aron paghatag og paglaom, ang Phoenix kinahanglan mosandig ni Calvin Abueva kinsa nag-average og 17 points, 15.5 rebounds ug 6.0 assists pero kinahanglan usab nga maminusan niya ang iyang 6.0 nga turnovers.
Ang suporta nila ni Matthew Wright ug Jason Perkins ug ang ipadayon usab nila ni RJ Jazul, JC Intal ug Alex Mallari ang ilang consistent nga pag-abag. JBM