PLANO sa pamilya nga iuli dinhi sa Sugbo ang lawas ni self-confessed drug lord Franz Sabalones.
Apan matod sa usa ka tinubdan nga nihatag og impormasyon sa kondisyon nga di lang siya nganlan, naproblema ang pamilya ni Sabalones tungod sa kadako sa giingong gipangayo sa punerarya diin gidala ang lawas.
Maglisod ang pamilya asa magkuhag kwarta nga ikabayad aron unta madala dinhi sa Sugbo ang lawas.
Wa mohatag og tukmang kantidad ang tinubdan, apan niingon siya nga sobra ra kadako ang gipangayonga maglakip sa serbisyo sa pagbiyahe sa lawas.
Ang tinubdan wa pa masayod kanus-a madala si Sabalones kay magdepende kini sa dagan sa negusasyon.
Si Sabalones gipusil patay sa wa pa mailhing mamumuno niadtong Huwebes sa tungang gabii sa dalan Borromeo, corner Mother Ignacia street, Barangay South Triangle, Quezon City.
Si Sabalones gikan sa laing duwa sa billiard dihang niadto sa laing billiard hall sa Quezon City.
Alas 11:45 sa Huwebes sa buntag, ang nagpailang kabanay ni Sabalones nga si Joselito Cabilao, beautician,taga Pasay City, ni-claim unta sa lawas ni Sabalones.
Gihatag niya ang kompletong ngalan niini nga si Franz Cabilao Sabalones, taga lungsod sa San Fernando, apan wa pa makuha ang lawas.
Lima ka mga identification card ang nakuha sa mga pulis sa bag ni Sabalones nga nagka lain-lain lang ang mga ngalan.
Una siya nga giila nga si Jerome Cabilao, alyas Abdulyakin Tating Limpasan, nagpuyo sa Calle Zaragosa Castillo Classic, BF Resort Village, Talin Dos, Las Pinas City.
Matod sa hepe sa Criminal Investigation Detection Unit sa Quezon City Police District Police Major Elmer Monsalve nga kalit kaayo ang hitabo nga bisan ang mga kauban ni Sabalones wa makakita sa pagpamusil.
“Walang makapagsabi kasi busy kasi mga tao dahil may tournament sa bilyar. Puro nakatotok doon sa loob,” matod ni Monsalve sa Superbalita Cebu.
Gituohan nga shotgun ang gigamit sa pagpusil tumong sa ulo nga miresulta sa pagkabuak sa iyang bagol-bagol.
Usa sa mga kasaligang tinubdan sa Superbalita Cebu sa kaulohan nga dili magpahingan niingon nga sa Las Pinas nagpuyo si Sabalones human ni gibuhian sa Camp Crame.
Nagtago usab si Sabalones sa Misamis Occidental ug giingong nilarga sa Malaysia agi sa back door sa Mindanao.
Pag-abot niya sa Manila giingong nagpadayon gihapon sa iyang illegal nga negosyo sa illegal nga drugas sa probinsya sa Sugbo.
BLANGKO
Blangko pa ang mga imbestigador sa Quezon City Police District sa pagpusil patay kang Sabalones.
Matod ni Monsalve nga kasamtangan nga nagkuha pa silag mga ebedensya sama sa mga CCTV footage sa lugar.
Mga opisyal sa San Fernando nga kauban sa maguwang ni Franz nga si Bise Mayor Fralz Sabalones ingon man police officials sa Sugbo wa motubag dihang kuhaan unta og reaksyon sa Superbalita Cebu.