ILLEGAL drugs ang unang motibo nga gisusi sa kapulisan sa pag-ambush sa usa ka pulis nga nadestino sa Regional Election Monitoring Action Center (REMAC) sa Police Regional Office PRO-7.
Si Police Master Sergeant Roy Ryan Cavalida, 36, kinsa gibanhigan niadtong Biyernes Santo pasado alas 7 sa gabii, nadestino kaniadto sa Provincial Intelligence Branch (PIB) sa Cebu Provincial Police Office (CPPO).
Si Cavalida lumad sa Samboan, apan kasamtangang nagpuyo sa Brgy. Bacayan, Dakbayan sa Sugbo,
Si Cavalida naigo sa paa ug tiyan atol sa pagpamanhig.
Ang maguwang ni Cavalida nga si Nanette Cavalida Dieparine, 50, naangol usab human maigo sa sampot.
Ang duha daling gidala sa tambalanan sa lungsod sa Malabuyoc, apan gibalhin sa ospital sa Dakbayan sa Sugbo.
Matod ni Police Senior Master Sergeant Bethoven Rocamora, usa sa mga responding officer sa Samboan Police Station, si Cavalida gikan sa simbahan sa lungsod nikuha sa iyang mga kabanay nga gikan nanghawok.
Dihang padulong na mo-park ang silver nga Honda City ni Cavalida atubangan sa ilang pinuy-anan sa sityo Pajo, Barangay Poblacion, upat ka wa mailhing mga mamumuno nga luwan sa duha ka mga motorsiklo niabot ug nipaarak sa sakyanan ni Cavalida sa way igong hinungdan.
Human sa pagpaarak, giingong nakagawas si Cavalida sa sakyanan ug nakakamang sa kasagbotan diin ngitngit ug nibawos pagpusil sa mga gunman gamit ang iyang 9mm nga pistola hinungdan nga dali usab nanibat ang mga gunman.
DRUGAS?
Ang hepe sa Samboan Police Station nga si Police Lieutenant Warlito Tuñacao, dihang nahinabi ning mantalaan, nibutyag nga nakadawat siya og taho gikan sa mga lumolupyo sa Samboan ug ingon man sa iyang mga sakop nga posibleng nalambigit sa ginadiling drugas si Cavalida dihang sakop pa siya sa PIB.
Usa sa ilang gitan-aw mao ang parte sa trabaho niini pagka pulis hilabi na ang iyang pagkakanhi sakop sa PIB nga ilang susihon. GCM