SUD sa pito ka oras, sirad-an ang katunga sa dalan nga pabor sa dagat gikan sa Barangay Langtad hangtod sa Barangay Inayagan sa dakbayan sa Naga karong Abril 28 alang sa himuon nga Sun Life 5150 Triathlon Cebu.
Si Jonathan Tumulak, focal person on traffic management sa Kapitolyo, nipahibawo nga sugod alas 5 sa kaadlawon hangtod sa alas 12 sa udto sirad-an ang katunga sa maong mga dan.
Ang dakbayan sa Naga maoy napili sa Sunrise Events Inc. nga lugar alang sa maong dakong kalihokan sa paugnat sa kusog.
Matod ni Tumulak, ang 5150 Triathlon Cebu kay elimination round diin ang makahuman niini mahimong makasalmot sa Ironman sa sunod tuig nga ipahigayon gihapon dinhi sa Sugbo.
Ang triathlon sugdan pinaagi sa 1.5 kilometros nga lumba sa langoy sa alas 5 sa buntag, dayon ang 40 kilometros nga pagbisiklita ug ang 10 kilometros nga lumba sa dagan.
Sumala niini ang lumba sa bisiklita magsugod gikan sa plaza sa siyudad hangtod sa boundary sa Barangay Inayagan nga kaupat magbalikbalik.
Atol sa Kasayuran forum nga gipasiugdahan sa Provincial Information Office, si Tumulak nipasabot ang pagpasira sa dan gikinahanglan buhaton aron paghatag og higayon sa mga athleta nga mosalmot sa triathlon ug malikayan ang ilang pagkadisgrasya.
Alas 5:30 sa buntag himuon ang unang buhi sa magbisiklita diin target ang 500 ka mga athleta.
“So, kining pagpirmerong buhi, mao ni delikado kay ang mga professional ang unang modagan, ang ilang estimate nga speed is 30 to 40 kms per hour. Unya inig abot dinhi sa tungatunga, mao na tong mga hinayon. So, estimate nga mahuman 12 noon,” dugang ni Tumulak.
Siya niawhag sa mga motorista ug molupyo nga motan-aw sa Facebook page sa kagamhanan sa dakbayan sa Naga kay dinhi i-post nila ang mapa og asa dapita ang ilang mga diversion road labi na kadtong mopaingon og Toledo.
‘SUGAT'
Sirado ang national highway sa Minglanilla gikan sa eskina Sangi-Calajoan paingon sa eskina Jollibee-Plaza gikan sa alas 4 sa hapon hangtod sa alas 6 sa gabii alang sa Sugat Kabanhawan 2019.
Mga sakyanan paagion gikan sa eskina Sangi-Calajoan, paingon sa Tulay, lapos sa Tungkop. SCG