DUL-AN sa tunga na sa mga barangay sa Dakbayan sa Sugbo ang apektado sa nagpadayon nga pagnihit sa tubig sa Metro Cebu subay niining huwaw.
Sa labing uwahi nga datus sa Metropolitan Cebu Water District (MCWD), niabot na sa 32 ka mga dapit o barangay sa dakbayan sa Sugbo ang way agas o minus ang oras sa agas sa ilang mga gripo.
Lakip niini ang Barangay Guadalupe (Horseshoe Drive ug pipila ka parte sa Banawa), Capitol Site (Oprra, Ipil-Ipil, Clavano ug Juana Osmeña), Kamputhaw, Sambag 1, Sambag 2, Bulacao, Inayawan, Cogon Pardo, Poblacion San Nicolas, Basak Pardo, Quiot, Mambaling, Duljo-Fatima, San Nicolas Proper, Sawang Calero, Suba, Pasil, Pahina Central, Kalubihan, Ermita, Calamba, Zapatera, Day-as, San Antonio, Tejero, T. Padilla, Parian, Kamagayan ug Labangon (Katipunan, Salvador Ext.), Pier area, North Reclamation Area ug N. Bacalso Ave.
Matod sa tigpamaba sa MCWD Charmaine Rodriguez-Kara nga nagpadayon ang ilang pagrasyon sa tubig sa maong mga dapit pinaagi sa paghatag og tubig gamit ang mga truck.
Samtang gigamit na sa MCWD ang ilang Mobile Siphon Tank sa bukirang barangay sa Cebu City aron makahatag og tubig sa mga residente.
Ang mobile siphon tank adunay kapasidad nga 1,200 cubic meters matag adlaw kun 1,200 ka mga balay.
Gigamit kini human sa bagyong Yolanda sa Bantayan ug sa mga bukirang barangay sa Dakbayan sa Sugbo, diin mao ang mo-treat sa tubig aron magamit kini.
Anaa kini gibutang sa Buot River sugod ning buwana, diin makapahimulos ang mga barangay sa Taptap, Adlaon, Babag, Sirao, Malubog ug Pung-ol.
Mamahimong mokuha og tubig ang mga residente sa tangke sugod alas 9 sa buntag hangtod alas 4 sa hapon nga libre.
Wa hinuon gitambagan ang mga mogamit nga moinom sa maong tubig, apan mahimo kining ikapanghugas sa mga plato ug pagpanglaba.
RASYON SA TUBIG
Rasyon sa tubig sa kabarangayan sa urban areas sa dakbayan sa Sugbo gipanglantawan nga mopaspas sugod karong adlawa.
Si Konsehal Dave Tumulak, kinsa maoy gitahasan sa City Hall pag-apud -apod og tubig uban sa MCWD ug Bureau of Fire Protection nagkanayon nga nihinay ang panginahanglan niadtong Biyernes Santo ug inanay nga nibalik ang demand kagahapon.
Si Tumulak niingon nga niadtong Biyernes, upat ra ka water tanker ang ilang na-deliver itandi sa 10 ka tankers niadtong Huwebes Santo.
Ilang kanunay nga suki mao ang tulo ka mga sityo o lugar habig sa Banawa, lakip na sa Englis sa Barangay Guadalupe, Kalunasan ug Capitol Site.
Niadtong Huwebes, ang demand niabot sa mga sityo sa Barangay Mambaling ug Basak San Nicolas diin hinay ngadto sa way agas ang gripo sa kabalayan.
Ang konsehal niingon nga nangandam na silang daan para sa bul-og sa mga request sugod karon hangtod sa mosunod nga mga semana hilabi na niining grabeng kainit nga nasinati karon.
Iyang gipadayag nga sa 19,800 ka households sa urban areas, hinay gihapon ang pressure sa tubig ngadto sa walay agas.
Kon anaa man,moagas ra kini sulod sa pipila ka oras panahon sa gabii o kadlawon.
Sugod niadtong Lunes, ang fire hydrants sa south district wa na kuhai og tubig gumikan sa hinay nga pressure.
Ang mga firetruck ug water tankers didto nikuha sa mga hydrant sa north district sanglit kusog ang pressure sa ilang mga bomba.
Apan gipaniguro ni Tumulak ug Charmaine Kara sa MCWD, nga aduna pay makuhang tubig gikan sa MCWD para ihatag nga libre ngadto sa libuan ka mga konsumidor.
Ang tubig nga makuha gikan sa mga hydrant sa MCWD adto malista sa non-revenue water ( NRW) diin ang mga konsumidor di na kinahanglang magbayad sanglit dili kini motatak sa ilang monthly bills. dugang taho ni PAC