SECTIONS
Monday, May 20, 2019
SUPERBALITA CEBU

Uno ang paboritong numero

SUKAD pag Grade 1 hangtod nigradwar sa kolehiyo, kanunay mag top one si Wenilyn Sabalo, taga St. Bernard, Southern Leyte.

Niadtong Marso 30, ang 20 anyos nga dalaga ni-graduate isip magna cum laude sa kursong Journalism sa University of San Jose-Recoletos (USJ-R), dakbayan sa Sugbo.

Siya ang top one sa tanang mga gradwado nga mga magna cum laude pinaagi sa iyang 1.2425 generated weighted average.

Ang iyang kalamposan nahimong posible gumikan sa suporta sa iyang mga ginikanan nga sila si Wenie Sabalo, 44, usa ka construction worker, ug Marrisa, 44, tig-atiman sa mga anak ug sa ilang kabanay habig sa iyang inahan nga nitabang sa iyang pagtungha dinhi sa siyudad sa Sugbo.

Si Wenilyn ang kamaguwangan sa tulo ka magsuon. Ang iyang manghod nga lalake, si Wenchel, 16, usa ka honor student samtang valedictorian ang iyang manghod nga babaye nga si Wenamae.

Unsay nakapadasig niya nga kanunay mag top one? Aron makatabang siya sa pagpaeskwela sa iyang mga manghod ug mga kabanay nga gusto makatiwas og tungha.

Si Wenilyn nipaambit nga nabatasan na sa ilang mga kabanay nga magtinabangay aron makalampos sa pagtungha ang mga paryente nga nagkalisod.

“Gusto nako ma-change ang image sa entire angkan namo. Kay negative ang tan-aw sa mga tawo sa amoa kay akong lolo naila nga palahubog,” sigon ni Wenilyn. “Witness mi kon unsa kalisod ang among pamilya. Mag-away akong papa ug mama pag-budget sa kwarta.”

Ang iyang amahan high school ang natapos samtang taman sa first year college ang iyang inahan.

Sukad sa first year college hangtod sa fourth year, academic scholar na si Wenilyn human kini nigradwar nga valedictorian sa Cristo Rey Regional High School sa St. Bernard. Valedictorian usab siya dihang nigradwar sa Mahayahay Elementary School sa ilang barangay.

Isip academic scholar, may diskwento ang bayranan sa iyang tuition apan, kinahanglan kini mag-maintain og dagkong grado nga di moubos sa 1.4.

Ang ig-agaw ni Wenilyn nga si Fredmark Pulgarinas, usa ka seaman ug anak sa igsuon sa iyang inahan nga si Marilyn Claro, ang nitabang pagbayad sa miscellaneous ug ubang bayranan, apil na ang kinahanglanon sa pagtungha sama sa mga libro.

Sa pagtungtong sa third year college, nakapahimus usab si Wenilyn sa Student Financial Assistance Program (StuFAPs) sa Commission on Higher Education.

Sa iyang Baccalaureate speech, gipasalamatan ni Wenilyn ang mga tawo nga nakatabang sa iyang pag-eskwela ug gikanta usab niini ang awit nga “A Whole New World” nga naghulagway sa iyang mga kasinatian sa pagpanimpad sa Sugbo.

“Ang limitation sa imong resources, dili limitation sa imong will. Kon gusto ka mohawa ana nga situation makahuman gyud ka kay naay i-send si Lord nimo para motabang nimo,” dugang ni Wenilyn.

Mismo si Rev. Fr. Cristopher Maspara, OAR, presidente sa USJ-R, ang nitaod sa medalya ngadto kang Wenilyn. Ang iyang mga ginikanan ug igsuon nga gikan sa Southern Leyte ang nibiyahe sa Sugbo aron motambong sa iyang graduation. Samtang sila si Marilyn ug ig-agaw ni Wenilyn nga si Carl Therence maoy nitambong sa Baccalaureate Mass. SCG


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!