SECTIONS
Monday, May 20, 2019
SUPERBALITA CEBU

Sugilanon: Pagkahanaw ni Madeo

NAKUGANG ang tibuok balangay sa San Bartolome nga nahibulong sa kalit nga pagka usab ni Madeo nga kanhi hilabihan ka palahubog, sugarol nga numero uno, babaero ug kanunay lang maapil sa kasamok sa kalingawan, sama sa disko ug uban pang kalingawan sa ilang baryo. Sa mga rambol apil siya. Sa mga engkuwentro sa mga ‘gang’ sa ilang lungsod, ingon man sa ilang baryo. Duna siyay ‘gang’ nga gikahadlukan dinhi sa ilang lungsod.

Apan naunsa ba, kalit man lang nausab si Madeo human siya masakit og grabe kaayo. Nagbalik-balik lang siya sa ospital ug sa binisayang tambalan, apan wa gihapoy alibyo ang iyang sakit. Ang mga doktor way nakita nga hinungdan sa iyang sakit. Nakahukom ang iyang ginikanan nga pagawson na lang siya sa ospital. Daot na kaayo si Madeo. Ug ambot unsay nakaon ni Madeo nga human sa usa ka buwan niyang paglubog sa banig, naayo man siya sa iyang sakit ug nahibalik ang kanhi niyang kalagsik. Ug ning miaging mga adlaw ilang nakita si Madeo nga nagdalag Bibliya, ug matod pa nagsangyaw kuno kini bahin sa kaluwasan sa katawhan ug ang pagbalik sa Manunubos nga si Hesukristo dinhi sa kalibutan.

“Unsa, si Madeo nahimo nang Magsasangyaw? Uy, basin nalisoan na kini sa maayong pangisip. Dili man siya ingon ana kaniadto. Hilabihan kabagis kanang tawhana. Unya karon, nag-ingon ana siya? Duna gyuy depekto sa utok,” nagkanayon si Pascual nga palainom sad kaayong dako ug himabaye pa.

“Aw, basin gikunsaran siya sa Holy Spirit ug maong naiangon siya ana, nga mag-usab na sa iyang kinabuhi. Aw, nindot man sab na ba, kinahanglan nga mag-usab gyud ta. Kinsay nasayod?” ni Elmo nga Diyusnon kay ‘lay minister’ siya sa simbahan sa lungsod.

Sa pagkabati ni Pascual bahin sa gipamulong ni Elmo misutoy siyag lakaw kay naigo sa sulti ni Elmo.

Nagpadayon pagsangyaw si Madeo sa maayong balita. Daghan ang misaway ug mibugalbugal kaniya. Dihay higayon sa usa ka sityo dinhi sa ilang balangay nga gidukol siya sa iyang ulo ug gibugalbugalan sa usa ka batan-on, apan wala gayud matandog si Madeo. Nagpadayon siya pagkutlo og mga pulong gikan sa dala niyang Bibliya, sa mga bersikulo bahin sa kaluwasan sa sala sa tawo.

Unya may mihugpa nga sakit sa ilang baryo, usa ka matang sa sakit sa panit. Ang mataptan makasinati og hilanat. Tungod niini nangadto sila, nanungas sila sa bungtod nga nahimutang sa ibabaw sa ilang balangay kay atua man didto ang payag ni Madeo. Ug anhi dinhi sab magsangyaw si Madeo, labi nag daghang tawo ang manganhi kay mituo nga maayo ang iyang gibuhat.

“Madeo, tambali mi kay nagdugo na ning among mga lawas. Luoy kaayo among mga anak. Hapit kami tanan sa atong baryo gipangnuka daw sanla!” matod ni Elmo nga miduol kang Madeo.

“Dili ako makahimo pagtambal sa mga sakit, Elmo,” hinay nga namulong si Madeo kansang mga kamot nagkupot sa Bibliya. Wa akoy gahom sa paghimo niana. Tawo lamang ako ug dili Ginuo. Si... si... Hesus ray makahimo niini. O, sige. Hangyuon ko kamong tanan sa paghangad sa langit. Kitang tanan mag-ampo ug pangayuon ta Kaniya nga maoy Labawng Makagagahom nga mawagtang na kining sakit nga mihugpa sa atong balangay!” milanog ang tingog ni Madeo. Mituo silang tanan.

Ug unya kusog nga mituaw si Madeo, “Diyos namong Hesukristo, ayuha intawon sila sa ilang mga sakit, kay ikaw man ang Labing Gamhanan sa tibuok kalibutan!”

Human sa pag-ampo ni Madeo kalit nga mingitngit, midag-om ang langit ug mibunok ang ulan. Nahumod ang mga sapot sa mga tawo. Nabasa ang ilang kalaswasan ug naligo sila sa ulan. Namauli sila nga gaan ang pamati sa ilang kalawasan.

Pagka ugma nakaingon ang mga molupyo sa balangay nga ang pagbunok sa ulan didto sa bungtod ni Madeo maoy usa ka milagro gikan sa langit kay kalit man lang nangaayo ang ilang mga sakit. Giadto nila ang payag ni Madeo sa bungtod aron magpasalamat, apan wala na kini nila igkita didto. Ug gibati sa taga balangay ang kamingaw kang Madeo nga kalit lang nahanaw. (KATAPUSAN)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!