SECTIONS
Wednesday, June 19, 2019
SUPERBALITA CEBU

Diola: Mingsutoy

Mao Diay

DI gyod malikayan nga kon magkapundok ang mga bata ug magsugod og duwa, magdinaganay ug magsininggitay kini. Adunay gawasnong pagbati nga matagamtaman sa pagdagan. Mao nga daghang mga duwa sa bata nga apil ang pagdinaganay: bato-lata, shatong, tagatagaanay, tubigtubigay, ug uban pa. Kaniadto daghang piskay nga mga batan-on tungod niini ug alaot ang bata nga nagpunay lang og lingkod, nagtan-aw og TV o computer. Apan, gawas sa duwa, natural nga mosutoy sad og dagan ang bata inig-abot sa ginikanan.

“Sa unang adlaw sa semana, ngitngit pa sa sayong kabuntagon, miadto si Maria Magdalena sa lubnganan ug nakita niya ang bato nga giligid gikan sa lubnganan,” nagkanayon ang ebanghelyo. Lahi ang kangitngit nga gihisgotan dinhi sa kangitngit nga miputos ni Judas, nga gihisgotan gihapon sa ebanghelyo ni Juan. Kangitngit kini nga padulong na sa kahayag.

Mingsutoy og sumbong si Maria ngadto kang Simon Pedro ug sa laing tinun-an nga gimahal ni Jesus. Mingsutoy og dagan usab ang duha padulong sa lubnganan apan ang laing tinun-an nakaunag abot sa lubnganan. Nagduko lamang siya ug wala misulod kay gipauna niya si Pedro. Human mosulod si Pedro, siya misulod pod. Nakita niya ang timailhan sa pagkabanhaw: ang waysulod nga lubnganan ug “ang lino nga nakatag ug ang panapton nga nahimutang sa iyang ulohan wala nabutang uban sa lino, apan nalukot paglahi sa usa ka dapit”. Mituo siya.

Makapasutoy og dagan ang gugma. Apan maantigo pod ang gugma mohulat sa uban ug mohatag og katahoran sa mga nagkupot og katungdanan sa katilingban, sama sa Kristohanong katilingban nga ang pangulo mao si Simon Pedro. Kugihan ang gugma ug andam mopunting sa gahom niini ngadto sa gihigugma. Gani, kon buot hunahunaon, si Maria Magdalena maoy nag-una sa tanan. Ngitngit pa sa sayong kabuntagon sa dihang miadto siya sa lubnganan.

Gikan sa kahuyang nga namunga og makatulo nga paglimod, maisugong mibarog si Pedro ug misangyaw sa Maayong Balita diha sa Mga Buhat sa mga Apostol. Mingsutoy siya. Dili na mapugngan ang iyang pagtuo ug paghigugma nga maoy nag-aghat kaniya pagsaksi kang Jesus.

Ang bag-ong kinaiya ni Pedro milarawan sa gihisgotan sa sulat ngadto sa mga Taga-Colosas. Kini nagkanayon: “Busa, kon nabanhaw kamo uban kang Cristo, pangitaa ninyo ang mga butang nga atoa sa itaas, diin si Kristo naglingkod sa tuo nga kamot sa Dios”. Pinaagi sa atong pag-ambit sa pagkabanhaw ni Jesus, diha sa bunyag ug sa ubang mga sakramento, ang mga babag sa atong pagsunod kaniya pagabungkagon. Mahimo na kitang mosutoy sa pagsunod kaniya.

Nabanhaw ug buhi si Cristo, atong Ginoo! Walay mopugong sa iyang paghigugma kanato kon at siyang tugotan.

Unsa may mipatigbabaw sa atong relasyon ni Cristo, kahadlok ba o gugma?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!