Binasi sa Mga Buhat 10:34, 37-43; Salmo 118; Taga Colosas 3:1-4; Juan 20:1-9
USA sa mga kinaham nga duwa sa mga bata mao ang dakopdakop. Magginukdanay dayon ang mga bata ug ang makadaug mao ang pundok sa bata nga makaunag hikap sa poste sa kaatbang nga pundok. Paabtikay ug papaspasay kini.Nag-agi na pod kita sa Kuwaresma ug Semana Santa.
Karong adlawa Pasko sa Pagkabanhaw ni Jesus. Nabuntog ang kamatayon. Mingdaug ang kinabuhing tunhay. Mora lag mingsutoy ang panahon. Ato ba kining gipahimuslan alang sa atong kaayohan? Usa ka babaye, si Maria Magdalena, ang unang miabot sa lubnganan nga walay sulod. Misumbong siya kang Simon Pedro ug kini ug ang laing tinun-an nagdagan padulong sa lubnganan. “Ang laing tinun-an nakauna pagdagan kang Simon Pedro ug una siyang miabot sa lubnganan, ug sa pagduko niya, iyang nakita ang lino nga nakatag, apan wala siya mosulod”, nagkanayon ang ebanghelyo. Basig dili tungod sa iyang pagkabatan-on ang rason kon nganong nag-una siya ni Simon. Sa laing bahin sa maong ebanghelyo, gitawag ang maong disipulo nga “disipulo nga gimahal ni Jesus”. Mingsutoy siya tungod sa gugma samtang ni Simon nagsangkiig pa sa usa ka sad-an nga tanlag.
Misulod si Simon ug nakita niya “ang panapton nga nahimutang sa iyang ulohan wala nabutang uban sa lino, apan nalukot paglahi sa usa ka lugar”. Wala pa siya motuo. Apan “niining tungora, misulod usab ang laing tinun-an...ug nakita niya ug siya mituo”. Misutoy siya pag-abot sa lubnganan ug siyang mingtuo. Mosutoy gyod kon tinukmod sa gugma.
Apan nakabawi ra gyod si Pedro. Gani sa mga Buhat sa mga Apostol nagwali siya mahitungod kang Jesus nga taga Nazaret nga “gidihugan sa Dios og Espiritu Santo ug gahum” ug nga siya gipatay apan sa ikatulong adlaw nabanhaw. Gitahasan sa nabanhawng Jesus ang mga disipulo sa pagsangyaw ngadto sa katawhan. Mingsutoy sila sa gugma sa Espiritu Santo.
Tungod kay mobalik man si Jesus gikan sa kalangitan, sumala sa sulat ngadto sa taga Colosa, kinahanglan “hunahunaon ang anaa sa ibabaw, dili ang anaa sa yuta.” Sa ato pa, kinahanglan bag-ohon ang kinaiya gikan sa kalibutanon ngadto sa langitnon. “Langitnon” kay ang gihigugma nato nga si Jesus atoa sa langit. Kon ipunting nato ang atong kasingkasing ngadto kaniya, inigbalik niya sa himaya kita usab namatay diha kaniya moambit sa iyang himaya.
Usahay mosutoy lang kita latas sa kinabuhi apan dili tinukmod sa gugma sa Ginoo kondili tinukmod sa kompentensiya, sa pagwalaypailob, sa kahangol, o tungod buot kitang molingkawas sa kamatuoran ug gugma sa Dios.
Niining Domingo sa Pasko sa Pagkabanhaw sa atong Ginoong Jesucristo, masaligon ug madasigon natong dawaton ang kamot sa Nabanhawang Jesus nga mingluwas kanato.