SECTIONS
Friday, July 19, 2019
SUPERBALITA CEBU

Mongaya: Goons na ang kapulisan?

Panahom

SIMPLE lang ang akong reaksyon sa Facebook kabahin niining mga sunod-sunod nga mga operasyon sa usa ka police unit diin target ang mga sakop sa BOPK. Nahimo nang goons ang kapulisan?

Apan yuna pa. Ang tibuok kapulisan sa Syudad sa Sugbo ba gyud ang naghimog mga checkpoint sa kabukiran, sa Lahug duol sa balay ni Konsehal Mary Ann delos Santos, ug tungod gyud sa gate sa balay ni Mayor Tomas Osmeña?

Kon atong tan-awon ang mga mga video nga gi-upload ni Mayor Osmeña sa iyang Facebook, makita nato nga ang unit nga nag-operate mao ang Cebu Mobile Force Company (CMFC).

Wa moapil ang mga police stations. Wa manginlabot ang Swat. Samot nga nidistansya ang R2.

Ambot lang ning atong police beat karon kay wa man makahatag og dugang mga detalye kabahin niining CMFC, ang hepe niini, ug kinsay iyang mga boss aron atong matugkad nganong naming man kaayo kin inga mogulat sa BOPK.

Alang kanako, dakong hagit sa atong police beat journalists nga mahatagan ang publiko og mas klarong hulagway sa mga panghitabo. Nganong nahigot na man ang reporting sa “sulti niya” ug “tubag niya?” Lupig pay showbiz reporters hinuon.

Kon buot hunahunaon, ang hepe sa CMFC wa motuman sa mando sa iyang labaw nga si PNP Chief Oscar Albayalde ug Presidente Rodrigo Duterte mismo nga di moapil sa politika ang kapulisan. Modiretso ta kanila kay nag-leave baya si Cebu City Police Office Director Royina Garma.

Wa hunahunaa niining hepe sa CMFC nga nangil-ad na hinuon ang imahen sa tibuok kapulisan dinhi sa Syudad sa Sugbo ug dili kini makatabang kang Director Garma alang sa iyang promotion.

Sa akong pag-aninaw sa kahimtang sa politika sa Syudad sa Sugbo man gud, mo-backlash kining ingon niini nga stratehiya.

Gamay na lang tingale ang makahinumdom sa panahon sa mga bunguton ug ilang mga dos-por-dos. Ang akong mahinumdoman mao mismo ang mga istorya sa akong anhing inahan, si Mom Nats (happy birthday diay sa akong pinalanggang inahan).

Matod pa, gisuwayan sa pag-terrorize ang mga taga Syudad sa Sugbo niining mga goons. Apan ni boomerang.

Nasuko na hinuon ang mga botante sa Syudad sa Sugbo.

Imbes maka-intimidate sa mga botante ug mga lider sa kabarangayan labi na sa kabukiran, nikusog hinuon si Serging Osmena niadtong tungora.

Mao nga nahimong buhi sa dughan sa mga botante kining slogan ni Serging nga “bisag unsaon.”

Mao kini ang akong basa sa epekto niining kalaki sa usa ka yunit sa kapulisan. Imbes makatabang sa mga kaatbang ni Mayor Osmeña, mao hinuon kini ang molubong kanila.

Di madala ang mga botante sa Syudad sa Sugbo og goons bisan pa man og mga sakop sa kapulisan kini. Tested na sila nga “Bisag Unsaon, OK gihapon.” (@anol_cebu sa Twitter)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph