HUMAN sa pipila ka mga buwan nga tagna-tagna hain na si self-confessed drug lord Franz Sabalones, natubag kining mao nga pangutana human siya patya sa Quezon City sa mga mamumuno nga wa pa mailhi ug mahibaw-i kon pila ka buok.
Napatay si Sabalones niadtong Huwebes Santo sa kaadlawon, Abril 18. Gituohan nga shotgun ang gigamit sa gunman kay nagusbat ang bahin sa iyang ulo ug nawong human siya pusila maka usa ka higayon.
Human sa pagpatay sa pipila ka mga opisyal sa San Fernando ug sa mga tawo nga giingong apil sa iyang drug matrix, nisibaw ang mga estorya nga nibalik si Franz sa pagpamaligya og ilegal nga drugas.
Sa pangutana kon hain si Franz, ang Police Regional Office (PRO) 7 nangambot kay wa sila masayod. Daghan ang mga espekulasyon kon hain na siya.
Karon nga natubag na, ang pangutana karon kon nganong wa masayod ang kapulisan hain siya nga naa ra man diay siya sa Metro Manila nagpuyo ug nagpasiugda pa og duwa sa billiards, usa sa mga paugnat sa kusog nga iyang nahiligan, gawas sa basketball.
Tinuod kahang way pulis nga nahibawo hain siya o dunay official nga nahimo niyang protector ug handler?
Lisod tuohan nga human niya giyagyag ang tanan sa iyang drug matrix, apil na ang iyang police protectors, buhian lang siya sa kadakong kasayon. Kay kon kasohan ang mga tawo nga nalambigit kaniya, labina ang mga pulis, mamahimo siyang importante nga saksi sa estado.
Apan lain na usab kining makapahibung tungod kay way nadungog nga mga opisyal nga gipasakaan og kaso. Bisan kadtong iyang mga gaway, wa igdungog nga gikiha, lahi sa ilang Kerwin Espinosa ug kaubanan.
Sa ingon niini nga mga hitabo, di kalikayan nga magduda ang publiko nga dunay pipila ka mga opisyal nga nakapahimus sa bahandi ni Sabalones.