SECTIONS
Friday, May 24, 2019
SUPERBALITA DAVAO

Legario: Patoo lagi

“PATOO lagi.” Mao kini ang permanenteng ginaingon sa akong amahan kanako kadtong nagatubo ko sa iyang poder. Magpatoo gyud sa mga tiguwang. Matud pa niya, adunay kaalam kining mga edaran kung maghisgot ta’g kinabuhi.

Kaniadtong mas bata pa ko, hilig kaayo ko’g dula sa bakilid. “Ayaw’g suong diha sa kakahuyan kay naay halo diha.” Nisuong man gyud. Maayo gani kay buotan ang halo. Wa ko napaakan.

“Bisbisi kining imong gitanum nga mga gulay matag-buntag aron dili mangalaya.” Nagsalig man lagi sa ulan, unya, nangamatay ang mga tanum kay sa sunod duha ka semana, wa ma’y ulan nga namisita.

“Ayaw’g kuha og itlog didto sa pugaran ha? Kay tusikon gyud ka sa mungaan,” pagpasidaan kanako sa akong uyoan. Wa man gyud nakaaguwanta, akong gikatkat ang pugaran, ug gikuot ang usa ka itlog. Nakabantay ang himungaan, ug gitusik-tusik ang akong kamot hangtud ang itlog akong nabuhian.

Patoo lagi.

“Paghinay lang og drayb sa motor ha? Kay dili man lumba ang pagdrayb,” ingon kanako sa akong nanay. Giganahan man ko og pakusog. Nitabok ang iro, akong nabundol, yabo ko’s daplin, sa ospital ang ending.

Nganong lisud man gyud ning magpatoo uy. Hangtud ron, bisan ang mga hamtong, lisud gihapon patoohon. Ingnan nimo’g dili mag-inom, maghubog hinuon. Ingna’g matulog og sayo, magbilar hangtud kaadlawon.

Lisud usahay magpatoo uy. Kay sa imong pagpatoo, imong ginatugotan nga isulod imong kaugalingon sa bulsa sa tawong imong ginatoohan. Unya’g sayop diay siya? Ikaw ang mag-aguwanta sa konsekwensiya. O basin gibinuangan ra diay ka? Imong dughan pastilang sakita.

Kining mga pangutana nagpasabot nga lisud kaayo kanato ang magsalig sa ubang tawo. Ang pagsalig mao ra gyuy yawi sa pagkamatinuohon. Wa na gyuy lain.

Adunay usa ka gamay’ng bata nga nakalusot sa grills sa gawas nga dapit sa ikaduhang palapag sa ilang balay. Ang nakakita nga silingan nidaga’g pinaabtik tungod sa bata ug giingnan nga moambak kaniya. Dili gyud moambak ang bata nga naghilaka. Daghan nang mga silingan ang naa sa ubos aron masalbar ang bata, apan dili gayud siya moambak ngadto kanila.

Niabot ang amahan sa bata. Pagkakita sa bata sa iyang tatay, nikatawa ang bata ug kalit nga niambak ngadto sa iyang amahan. Naghugyaw ang tanan sa kalipay kay naluwas ang bata, tungod sa iyang pagsalig sa iyang amahan.

Matud pa ni haring Solomon, “Anak, patoo gayud sa imong amahan, ug dili isalikway ang mga maymay sa imong inahan, kay mao kini ang mga ornamento sa imong ulo, ug kulintas sa imong liog,” (Prov. 1: 8).

Nasulti kini ni haring Solomon mga higala tungod kay iyang na-eksperyensiyahan nga ang pagpatoo sa mga katigulangan maoy makahatud kanato sa kalampusan. Mao kini ang usa sa mga bidlisiw sa paglaum nga makab-ot nato ang kalipay niining presenteng kinabuhi.

Salig ni Haring Solomon. Salig sa Diyos. Patoo lagi.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!