MAAYONG pagkabanhaw sa tanan?
Taas-taas nga panahon ang atong gitagana aron nga makapamalandong og lawom sa dakong gugma sa Ginoo alang kanato.
Human sa Iyang pagpasakit, paglangsang sa krus, karong adlawa mao ang Iyang pagkabanhaw nga nahimong timaan sa bug-os nga gugma sa Diyos alang kanatong iyang mga anak.
Pinaagi niini, gitubos Niya kita sa sala nga panulondon nga nga gikan pa sa atong mga ginikanan - Adam ug Eba.
Ang tibuok Simbahang Katoliko nagsaulog karon sa pagkabanhaw sa atong Ginoo, gitawag sab kini og Dominggo sa Pagkabanhaw.
Hingpit nang gibuntog sa Ginoo ang kangitngit sa kasal-anan ug mihulip ang bidlisiw sa kahayag sa paglaum alang kanatong tanan nga iyang giangkon nga mga anak.
Bisan og makakasala kita, apan Iya kitang gipasaylo ug giagak pagbalik ngadto sa iyang sabakan. Busa angay lang sab kita nga mopasaylo sa atong isig-kaingon nga nakasala ngadto kanato.
Unta ang kasaulogan magdala sab og kausaban sa atong kinabuhi isip sumusunod ni Hesukristo. Kabag-ohan gikan sa salawayon nga buhat ug sa paghunahuna og mga dautan.
Di mahingpit ang kaluwasan nga gustong mahitabo sa Ginoo para kanato kon kita mismo sa ato mismong kaugalingon di mabag-o sa gugma sa Ginoo.
Kay ang kabag-ohan wala sa atong palibot, apan naa sa atong tagsa-tagsa ka mga kasingkasing.