MAGUINDANAO PROVINCE -- Naangol ang duha ka tawo sa sinumbagay ug binatuhay sa magkaatbang nga kandidato alas 10:20 sa buntag, Miyerkules, Abril 17.
Sumala kang Maguindanao Police Provincial Office director Ronald Briones, dunay gipahigayon nga peace covenant tali kang incumbent Sultan Sabarongis Municipal Mayor Ramdatu Angas ug Mayoralty Candidate Mamatanto Mamantal sa Municipal Gym sa Barangay Poblacion, Sultan Sabarongis sa maong probinsiya.
Tunga-tunga sa programa sa peace covenant nga gipangulohan ni Maguindanao Comelec provincial supervisor Ernie Palanan, 601st deputy commander Joel Abrigana, 40th IB ug kapulisan kalit lang nagsinumbay ug nagbinatuhay ang mga taga-suporta sa magkaatbang nga kandidato.
Napugos ang mga sundalo ug pulis nga mag-warning shots sa ilang mga armas aron mapugngan ang nagkarambola nga pundok.
Duha sa mga taga-suporta ni Mamantal ang naangol usa niini dunay igo sa bala sa iyang lawas.
Gidala dayon ang mga samaron sa balay tambalanan sa Tacurong City ug luwas na sa makuyaw nga kahimtang.
Hinuon nadayon gihapon ang peace covenant ug nagkasabot ang duha ka grupo alang sa hapsay ug malinawon nga piniliay.
Gihangyo ni Palanan ang mga kandidato nga disiplinahon ang ilang mga tagasuporta nga sagad maoy nagsugnod sa kagubot. (Edgar E. Fuerzas)