ARAKAN, North Cotabato -- Nialsa na ang mga sibilyan batok sa mga miyembro sa New People’s Army (NPA) pinaagi sa paglusad og protesta alas 7:00 sa buntag, Sabado, Abril 20.
Gilusad sa mga molupyo ang “walk for peace and peace rally” sa Barangay Kabalantian, Arakan.
Gideklara sa mga molupyo sa Barangay Kabalantian nga persona non grata ang Communist Party of the Philippines-NPA-National Democratic Front (CPP-NPA-NDF).
Sumala kang Barangay Kapitan Charlie Segucal nga impluwensiyado sa NPA ang ilang dapit sulod sa hataas nga panahon.
Gumikan nagpahigayon og community support program ang 19th Infantry Battalion, Philippine Army nahigmata ang katawhan nga gibaboy lang sila sa mga NPA ug gihimo nga gatasan sa ilang walay pulos nga gipakigbisugan nga kawsa alang sa mga kabus.
Dugay na nga nagreklamo ang taga-Arakan sa presensiya sa NPA tungod sa pagpangilkil.
Apan nakaamgo na sila sa hiwing binuhatan sa NPA busa nialsa ug nakig-alayon sa militar.
Giangkon sab ni Kapitan Segucal nga niadtong milabay nga tuig mitaas ang ihap sa pagpamatay sa ilang dapit ug sagad hinimuan sa NPA.
Nangrekrut ang mga NPA sa ilang dapit og mga menor de edad pa ang gipugos nga moanib sa ilang pundok.
Sa kahadlok nga moabot ang panahon nga sila maangin, nakadesisyon sila nga mo-alsa batok sa NPA. (Edgar E. Fuerzas)