NANGBUTO ang pipila ka bomba sud sa storage area sa Special Anti-Terrorism Unit (SATU) sa Explosive Ordnance Disposal (EOD) sa Davao City Police Office (DCPO) headquarters sa Camp Domingo Leonor, alas 11:30 sa buntag, Sabado, Abril 20.
Subay sa report gikan sa DCPO pinaagi sa City Information Office, gibutyag nga usa ka “accidental explosive ordnance explosion” ang natigayon.
Anaa sa stock room sa EOD ang mga narekober nga mga eksplosibo nga ebidensya diin aksidente kini nga nangboto nga nakamugna og kusog nga pagbusikad sa SATU Barracks.
Sukad sa pagsulat Sabado sa hapon, nagpadayon ang Police Regional Office (PRO)-Davao sa pag-imbestiga sa hitabo aron masayran ang hinungdan sa pagbuto, samtang anaa sa lugar ang Central 911 ug kabomberohan gumikan sa mga itom nga aso gikan sa sulod sa stock room human sa pagbusikad.
“Those explosives are being kept in custody of our EOD unit at their Storage area considering that these are still kept as Court evidence. In spite it’s proper storage (in accordance to EOD Storage Standard), it accidentally exploded-for still unknown reason,” mensahe ni DCPO director Senior Supt. Alexander Tagum pinaagi sa CIO.
Hinuon walay nasamdan ug nakabsan sa kinabuhi sa maong hitabo, gawas lamang sa kalisang sa mga residente sa kasikbit nga barangay ug pipila ka mga pulis nga anaa sa barracks niadtong taknaa.
Sa impormasyon nga nakalap gikan sa DCPO atol sa pagbusikad, hilabihang kakurat sa pipila ka mga pulis nga on-duty niadtong taknaa, ug sa dihang ilang nasayran nga bomba ang mibuto gikan sa EOD stock room, nanagan sila sa luwas nga dapit ug mitaho sa ilang labaw, hinungdan nga miresponde ang ubang unit.
Sa kakusog sa pagbusikad, perteng gubaa sa stock room sa mga eksplosibo ug nangabangag ang kesame sa hallway sa kasikbit nga lawak.
Alegasyong naapil sab sa pagbusikad ang mga ebidensya sa dugoan Roxas Night Market Bombing, apan padayon pa kining gikumperma.
Dugang nasayran nga ugmang adlawa, Lunes gilayong mohimo og meeting ang kadagkoan sa DCPO aron subling ihan-ay ang mga ebidensya nga layo sa peligro. (Jeepy P. Compio)