FRED FUENTES MONTERNEL
Lorega Proper, Cebu City
BUNTAG sa Dominggo sa pagkabanhaw sa Ginuong Hesus. Mihunong ang puti nga Toyota Fortuner nila ni Berto ug Dina sa usa ka inilang Rehab Center sa siyudad. Nanganaog ang magtiayon ug misulod sa pultahan sa Rehab Center nunot ang pagsenyas sa guwardiya. Maoy nasugat sa ilang panan-aw ang ilang bugtong anak nga si Edgar nga nagpaso-paso sa pasilyo. Mihunong kini sa pagkakita kanila.
“Papa Berto! Mama Dina!” tuaw ni Edgar nga daling miduol sa iyang papa ug mama. Migakos siya kanila.
“P-Pa, M-Ma, pasayloa ko ninyo!” ni Edgar nga mitibi.
Gipikpik nilang Berto ug Dina ang abaga sa ilang anak nga ulitawo.
“Salamat, Ed, nga nahibalik na gyud ang normal mong pangisip!” Nagpahiyom si Berto nga padayong mihapuhap sa abaga ni Edgar kansang pikas kamot migakos sa iyang inahan.
“Bitaw, Ed, tulo na ka bulan nga gipa-rehab ka namo dinhi. Naggumon ka sa ginadiling drugas ug na-praning ka sa pagka adik nimo sa paghithit og shabu!” Nagyango-yango si Dina nga mihalog kang Edgar.
“Pasayloa ko ninyo, Pa, Ma! Nabiyaan ko ang akong pag-eskuyla. Wa ko makagradwar ning bulana sa akong kurso nga civil engineering.” Nangagho si Edgar nga padayong naggakos sa iyang papa ug mama diha sa taliwala sa pasilyo.
“Gipasaylo ka na namo, Ed. Ang mahinungdanon karon kay nahibalik na ang normal mong pangisip. Tana, kay Dominggo sa pagkabanhaw sa atong Ginuo karon. Gikan dinhi modiretso ta sa beach resort diin atua na ang atong mga paryente ug kahigalaan. Ako silang gipauna sa gi-reserba tang dako nga cottage,” matod ni Berto nga miagbay kang Edgar paingon sa gawas sa Rehab Center. Malipayon usab nga minunot si Dina. Nanakay dayon sila sa ilang sakyanan.
Samtang nagdagan ang sakyanan nahiunlod si Edgar sa halawom nga pagpamalandong. Nagumon siya bisyo uban sa iyang mga barkada sa siyudad nga sama niyang mga anak sa sapiang ginikanan. Naadiki siya sa shabu ug wala na mosulod sa klase sa unibersidad nga iyang gitunghaan. Wa niya paminawa ang tambag sa iyang uyab nga gradweting na sa Accountancy. Gradweting unta siya sa civil engineering, apan nalisoan siya sa iyang pangisip.
Sa usa ka matahom nga beach resort nasugat sa panan-aw ni Edgar ang dasok nga mga tawo nga nangaligo sa dagat atol sa Dominggo sa pagkabanhaw sa Ginuong Hesus. Sa usa ka dakong cottage nga gi-arayan sa mga lamiang mga pagkaon, lakip na ang duha ka bultong litsong baboy, gihangop si Edgar sa ilang mga paryente ug mga higala nga giimbitar sa iyang papa ug mama.
Unya may midagpi sa abaga ni Edgar. Sa iyang paglingi nakita niya si Grace, ang iyang uyab, nga misamot ang katahom sa gisul-ob niining pakigol nga shorts nga giparesan og nipis nga ‘bodyfit’ nga T-shirt. Giimbitar sab diay kini sa iyang papa ug mama.
“Happy Easter Sunday, Ed! Salamat sa Ginuo nga naulian ka na!” ni Grace nga nagpahiyom ug hugot nga mitutok kang Edgar.
“Malipayong Dominggo sa pagkabanhaw sab, Grace!” ni Edgar nga hugot sab nga mitutok sa hinigugma nga bag-o lang migradwar sa iyang kurso.
Gibutad ni Edgar si Grace. “Dali, Grace, daghan tang panagsultian atol sa akong pagkabanhaw ning Dominggoha!”
Malipayon nga nagtupad pagpangyaka sila si Edgar ug Grace sa balas sa baybayon. (KATAPUSAN)