MALINAWON sa kinatibuk-an ang pag-obserbar sa Semana Santa labina dinhi sa Misamis Oriental.
Matud ni Provincial Disaster Risk Reduction Management Department head Jun Dy nga nagmalampuson ang ilang pagbantay ug pag-obserbar niini gumikan sa kooperasyon ug tinabangay sa nagkalain-laing ahensya.
Matud ni Dy nga dako og tabang ang kapulisan pangulohan ni Police Colonel Rolando Destura nga naghatag og seguridad lakip ang ksundalohan pinangulohan ni Colonel Rey Derilo sa 58th Infantry Battalion sa 4ID.
“It’s an inter-agency cooperation gipaabot ug gihandom nga nagpabilin ang kooperasyon kay kinahanglan nato ang kada usa kanila,” matud ni Dy.
Niadto lamang Biyernes Santo moabot ngadto sa 50, 286 ka mga deboto ang midagsa sa Devine Mercy Shrine sa El Salvador City samtang 22, 018 ang nidagsa sa Sipaka Heights. Wala pay labot niini ang nagkalain laing pilgrimage site sa lalawigan sama sa Hinuklog sa Medina, Christ the King sa Gingoog, Immaculate Concepcion sa Laguindingan ug uban pa.
Ang kapulisan gitakdang maghatag og kinatibuk-ang ihap sa mga midagsa sa nagkalain laing Panaad sites sa lalawigan hilabina adunay mga lugar nga bag-ong gikonsiderang Panaad sites.
Hugot sab nga seguridad nga gipatuman sa mga simbahan ug beach resort ngadto atol sa Adlaw sa Pagkabanhaw niadtong Dominggo, Abril 21.