MALINAWON og wala’y dagkong natala nga panghitabo sa Davao City ug sa kinatibuk-ang Davao Region sa pag-obserbar sa Holy Week.
Kini ang mapasigarbuhon nga gipahibalo sa Police Regional Office (PRO)-Northern Mindanao human ilang nakab-ot ang “zero incidence rate.”
Usa sa mga gipanghambog sa kapulisan sa rehiyon ang ilang kaalerto sa tanang higayon nga bisan og wala’y dagkong kaugdahan, padayon silang igmat alang sa kaluwasan sa katawhan.
Ingon man ang kasundalohan, mapasalamaton sab gumikan malinawon ang ilang area of responsibility (AOR), mirespeto sab ang komunistang New People's Army (NPA).
Sa Davao City, malinawon sab ang dakbayan, walay natala nga mga dagkong hitabo, gawas lamang sa insidente nga pagbusikad sa mga eksplosibo sud sa kampo sa Davao City Police Office.
Kining tanan nakab-ot gumikan sa kooperasyon sa katawhan, - kooperasyon nga bunga sa makanunayong pahimangno sa otoridad sa mga regulasyon nga ipatuman diha sa publiko.
Sama na lamang panaglit sa 'No Backpack Policy' sud sa mga simbahan ug sa ubang lugar nga gidugok sa katawhan.
Kinahanglan ang kooperasyon sa katawhan di lamang ning panahon sa kuwaresma kun di sa tanang higayon.
Mag-ampo sa kanunay aron grasyahan sa panginahanglan ug ang grasya sa tinuod nga kalinaw sa matag dapit ning rehiyon maanaa unta sa katawhan.