KIBLAWAN, Davao del Sur -- Mokabat sa gibana-banang P3.4 milyones nga kantidad sa cannabis sativa o nailhang marijuana ang gipang-ibot sa hiniusang operasyon sa kapulisan didto sa bukirang parte sa Barangay Kimlawis atol sa Semana Santa.
Si Lieutenant Colonel Alan Manibog, police provincial director, nagbutyag nga gihimo nila ang “Oplan Ibot Marijuana” sa pakig-alayon sa Philippine Drug Enforcement Agency (PDEA)-Northern Mindanao, Provincial Intelligence Branch, Provincial Drug Enforcement Unit, 2nd Davao Sur Mobile Force Company, 1104th company sa Regional Mobile Force Battalion (RMFB)-Northern Mindanao, Regional Intelligence Division sa Police Regional Office (PRO)-Northern Mindanao, Alpha Company sa 39th IB Philippine Army ug Kiblawan Municipal Police Station, nga gisugdan alas 7:30 sa gabii, Huwebes Santo, Abril 18.
Sumala ni Manibog nga dihang nahidangat sila sa Barangay Bolol Salo, gisugdan dayon ang pagsuhid sa lugar, banda alas 10:30 sa buntag niadtong Byernes Santo, Abril 19.
Gihulagway sa opisyal nga mga lima ka ektarya ang gidak-on sa luna diin gihimong plantasyon sa marijuana ug nahimutang kini sa tulo ka mga dapit sa Sitio Blabaluyong sa Barangay Kimlawis.
Matod ni Manibog anaa sa 17,000 ka punuan sa marijuana ang ilang naibot.
Apan, tungod sa kalisod sa pangpang, mihimo na lamang ang mga operatiba og pagdaob sa 15 mil ka mga punuan aron di na mabug-atan sa ilang pagkanaog sa bukid.
“All 17,000 hills of uprooted plants have an estimated value of P3, 400,000.00 based on the PDEA assessment,” asoy ni Manibog.
Gilayon sab nga gitimbaya ni Manibog ang tanang sakop sa operasyon human nagmalampuson ang ilang tumong bisan nga anaa lang sa pikas baryo ang mga komunistang grupo sa New People’s Army (NPA).
“NPA has been sighted in the neighboring areas days before, it was also known that the areas were inhabited by the armed bandits who are ready to defend the plantation at any cost,” panapos ni Manibog.