MIDSAYAP, North Cotabato -- Gironda sa otoridad ang gipuy-an sa taas nga lider sa Bangsamoro Islamic Freedom Fighters (BIFF) alas 5:15 sa buntag niadtong Sabado, Abril 20, didto sa probinsiya sa Cotabato.
Giila ang nakabsan sa kinabuhi nga si Mando Mamalumpong alyas Kumander DM, sub-commander sa BIFF ug iyang sinaligan nga si Norhamin Sabdulla.
Gibutyag ni Police Lieutenant Colonel Bernard Tayong ang tigpamaba sa Cotabato Police Provincial Office nga nagpatuman og search warrant operation ang kapulisan uban ang puwersa sa 34th Infantry Battalion Philippine Army sa gipuy-an ni Kumander DM sa Sitio Macantal, Barangay Olandang, Midsayap, North Cotabato.
Pasulod pa lang ang raiding team, girakrakan na sila sa mga rebelde gamit ang mga tag-as nga matang sa armas.
Milungtad sa 30-minutos ang sinukliay og mga bala tali sa duha ka pundok.
Nanagan ang mga sibilyan paingon sa luwas nga dapit sa kahadlok nga maipit sa kagubot.
Napatay sila Mamalumpong ug Sabdulla diin nakuha gikan sa ilang posisyon ang usa ka M16 Armalite rifle, usa ka M14 rifle ug mga buhing bala.
Gironda ang balay ni Kumander DM gumikan sa kasong multiple murder and frustrated murder, paghupot sa mga tag-as nga matang sa armas ug uban pa.
Sa kasamtangan anaa sa taas nga alerto ang militar ug kapulisan sa Midsayap Cotabato sa posibleng pagbalos sa BIFF.