SHARIFF SAYDONA MUSTAPHA, Maguindanao -- Nagbinayluay na sab sa mga bala ang militar ug mga armadong grupo alas 9:15 sa gabii niadtong Sabado didto sa probinsiya sa Maguindanao.
Sa taho gikan sa Tactical Command Post sa 601st Brigade nga gikamang sa mga miyembro sa Bangsamoro Islamic Freedom Fighters (BIFF) ang detachment sa mga sundalo sa utlanan sa Shariff Saydona Mustapha ug Datu Salibo Maguindanao.
Abtik kining nabantayan sa mga sakop sa 40th Infantry Battalion, Philippine Army nga nagpabuto dayon sa ilang hinagiban.
Milungtad og 45-minutos ang sinukliay og mga bala tali sa duha ka pundok gamit ang mga tag-as nga matang sa armas.
Natugaw ang pagkatulog sa mga sibilyan nga gibati sa sobrang kahadlok sa kabalaka nga maangin sa kagubot.
Miatras sab dayon ang mga rebelde sa diha nga nagsingabot ang dugang puwersa sa kasundalohan.
Wala’y naangol sa militar samtang dili matino sa BIFF ubos sa grupo ni Kmander Bungos.
Sa kasamtangan nagpadayon ang paglutos sa Joint Task Force Central batok sa BIFF sa Maguindanao.