NAGBUGNO gawas sa usa ka lodging house sa Legaspi ug kanto Rizal Street, Davao City ang duha ka babaye kinsa ang usa giingong kabit ug ang usa mao ang legal wife, alas 11:45 sa gabii, Biyernes Santo, Abril 19.
Usa ka Mirasol, 34-anyos, taga Barangay Tigatto, Buhangin, Dakbayan sa Davao ang maoy nakasakop sa iyang bana nga si Raul, 32-anyos, negosyante kinsa kauban niini ang babaye nga si Stephany, 20-anyos.
Sa impormasyon gikan sa kapulisan sa San Pedro Police Station nasayran nga giukoy sa legal wife ang iyang bana kay halos matag adlaw sa alas 10 sa gabii kini mosibat gikan sa ilang balay sakay sa ilang sakyanan.
Giingong modulog una ang bana ngadto sa asawa aron makatulog kini, ug sa dihang daghan nang mga adlaw namatikdan sa asawa, nagpaatik-atik kini og hagok, ug sa pagsibat sa bana, gisundan niya kini.
Sumala pa nga gisuhid sa babaye ang tanang mga naka-parking nga sakyanan sa pipila ka sikat nga lodging house, apan sa ulahi, didto sa Kanto Rizal ug Legaspi niya nakita ang ilang sakyanan.
Giukoy niya kini, ug pipila ka minuto migawas ang iyang bana ug ang babaye kinsa manulod na unta sa lodging house, apan sa kasuko sa legal wife, dali kini niyang giduol ug giayo’g dumog ang kabit.
Maayo nalang kay naulang ang mga nahisgutan sa mga tawo niadtong taknaa kinsa nakaangkon og mga samad kinarwasan ang legal wife sa kamangtas sab sa kabit.
Sumala sa bana ngadto sa police duty desk officer nga wala sila manulod sa lodging house, kun di miagi lamang sila kay mangaon sa usa ka sikat nga kan-anan ug imnanan sa dapit.
Giingon sab sa bana nga di niya kabit si Stephany kun di higala lamang nga gipaila-ila kaniya sa iyang amigo nga negosyante.
Nakatakda nga husayon sila sa barangay karong adlawa, Lunes, Abril 22.