GILANGKAT ni kanhi two-division world champion John Riel Casimero ang World Boxing Organization (WBO) Interim world bantamweight title pinaagi sa makutas nga 12 round knockout nga kadaugan batok sa Mexican slugger nga si Ricardo Espinoza Franco kagahapon didto sa Dignity Health Sports Park sa Carson, California.
Gitumba ni Casimero (27-4-0, 17 KOs) si Franco (23-3-0, 20KOs) sa ikaunom nga round apan nakabarog pa kini og nakahatag og saktong binukbokay sa sunod nga mga hugna.
Sa tinguha nga makabawos, porsigedo gihapon nga misulod ug miatake si Franco nga daw sa maoy nakapaluya ni Casimero. Apan sa ika-12 nga round ug sa ikaduha nga higayon, usa na usab ka solidong kumo nmaoy nakapahagba og balik sa Mexican fighter.
Tuod man, nakabarog ug nakatubag pa kini sa ihap sa referee, pero wala na molugak si Casimero ug mipauwan gilayon sa iyang sunodsunod nga mga kinumo ug didto giundang ni referee Rudy Barragan ang away sa katapusang 44 segundos ug mideklarar sa lumad nga taga Ormoc City nga mananaog.
Sa kadaugan ug isip interim champion, nakaposisyon na si Casimero alang sa regular nga titulo sa WBO world bantamweight division nga karon gihuptan ni Zolani Tete sa South Africa.
Si Tete modepensa sa iyang WBO/WBA title karong Abril 27 batok ni “Filipino Flash” Nonito Donaire Jr. didto sa Lafayette, Louisiana.
Si Casimero maoy kanhi kampiyon sa International Boxing Federation (IBF) lightflyweight ug flyweight titles. (JBM, Philboxing.com)