GIHAMOK og gamayng kagubot ang paghibalik ni Joel Embiid sa Game 4 sa first round sa ilang Eastern Conference playoffs batok sa Brooklyn Nets kagahapon sa National Basketball Association.
Kini taliwala sa maayong gipakita aron pangulohan ang Sixers ngadto sa 112-108 nga kadaugan nga maoy nagbingat sa ilang bintaha, 3-1.
Nihugpa sa makadiyot ang kaguliyang sulod sa korte sa dihang si Jared Dudley mitukmod ni Embiid human kini gi-foul sa nauwahi.
Wa makauyon si Jimmy Butler sa gihimo ni Dudley ug didto mihugpa gilayon ang kaguliyan.
Sila si Butler ug Dudleyk pulos na ejected sa duwa. Wa malakip si Embiid tungod kay pasensiyado ug nagpabilin kining mabugnawon.
“I know these guys are going to go at me because they want me to retaliate, so I’ve got to be mature when I’m on the court and just stay cool and not react,” matod ni Embiid kinsa mikutlo og 31 puntos ug 16 ka rebounds aron pangulohan ang Sixers sa kadaugan. Aduna usab siyay unom ka blocks.
Sikit kaayo ang duwa nga nagpulipuli og sakmit sa labaw ang matag habig.
Ang pasa ni Embiid ngadto ni Mike Scott kinsa mipabuhagay gilayon og tres sa katapusang 18 segundos mayo nagduslit sa uwahing rally nga maoy nahimong agianan ngadto sa ilang kadaugan.
Si Caris Levert nangulo sa Sixers nga may 25 puntos, midugang og tag 21 sila si D’Angelo Russel ug Allen.
Sa laing Eastern playoffs, gipamatuod sa Milwaukee Bucks nga dili sila one-man team.
Gawas kang Giannis Antetokounmpo na may 14 puntos ug 10 ka rebounds, si Khris Middleton mitap-ig og 20 puntos, tag 19 ang natampo nila ni Eric Bledsoe ug Brook Lopez, Ersan Ylaysaoba, Nikola Mirotic ug George Hill nakapuga og 15, 12 ug 11 puntos.
Mahimong tapuson sa Bucks ang serya ugmang adlawa didto sa korte sa Detroit.
Si Blake Griffin, sa iyang paghibalik, mitali og 27 puntos, pito ka rebounds ug unom ka assists alang sa Pistons.
Sa Western playoffs, mipuga og 22 puntos si James Harden, 14 niini diha na sa fourth quarter, aron ihatod ang Houston Rockets ngadto sa 104-101 nga kadaugan batok sa Utah Jazz.
Ang Rockets mipausbaw na sa ilang bintaha, 3-0 sa series.
Mipabuto og tres si Harden ug laing duha ka free throws sa katapusang 42.4 segundos aron pabukaron ang ilang labaw, 101-97 Si Donovan Mitchell maoy top scorer sa Jazz nga may 34 puntos.
Gitabla sa Denver Nuggets ang ilang series batok sa host San Antonio Spurs, 2-2, pinaagi sa 117-103 nga dominasyon.
Si Nikola Jokic mipaulob og 29 puntos ug 12 ka rebounds, midugang si Jamal Murray og 24 sa maong kadaugan.
Mobalik ang series didto sa Denver alang sa Game 5 karong Martes (Miyerkules sa Pilipinas).
Si LaMarcus Aldridge mitali og 24 puntos ug siyam ka rebounds samtang si Demar DeRozan midugang og 19. (JBM)