MGA pasahero nangita sa libreng sakay sa mga bus sa ilang munisipyo. Nahitabo ni atol sa hinakutay sa nidagsa nga mga pasahero sa South Bus Terminal niadtong Meyerkoles Santo. Tungod sa kadaghan sa mga pasahero ang management sa terminal nagpatabang sa mga local government units pagpabiyahe sa ilang mga bus aron makibhangan ang nagsinardinas nga mga pasahero.
Di hinuon tanan ang nakapadala og bus apan bintaha nalang kay sa wala. Ambot og may mga politiko ba nga nakahunahuna og tunol og libreng sakay sa mga gipangkapoy og nilinya nga mga pasahero. Bisan libreng snack unta to. Hinuon may libreng entertainment ang gitunol ang mga pulis nga nituyo pagpakiglambigit sa mga pasahero. Talagsaon kadto nga labok nga angayang daygon. Di kini makalimtan nga kasinatian. Pero mas labaw nga di makalimtan ang problema sa trapiko nga nasugatan bisan kong semana santa.
***
Kong maghisgut ta og libreng sakay diay grupo sa mga habalhabal driver nga sakop sa SRP Motorjack Riders ang motunol og libreng sakay karong umaabot Abril 29 ug 30. Sigun sa ilang Chairman nga si Jay Capaning magsaulog sila sa ilang ikapito ka tuig nga anibersaryo karong Mayo 1. Agi og pahaum sa maong okasyon ang mga empleyado sa SM Seaside City ilang pasakyon nga way plete sugod sa alas 8:00 sa buntag hangtod sa alas 9:00. Sa ato pa karong Lunes, Abril 29, ug Martes, Abril 30, sunod semana, sa unang higayon makapahimus og libreng sakay ang mga empleyado sa ilang pagpadung sa maong tindahangikan sa parkinganan diha sa Mambaling sud sa usa ka oras.
Ang mga empleyado maoy ilang gipili tungod kay sama nila kanunay sab nga giapas sa badyet. Nindot ni nga proyekto. Bisan tuod kong limitado ra sa tagsa ka oras sa duha ka adlaw dako na ni og matampo sa budget sa mga empleyado.
Matod ni Jay nga tinguha nilang makapaambit bisan sa ginagmayng paagi ngadto sa mga trabahante sa usa ka matang sa serbisyo nga wa pa sukad matilawi sa ilang mga suki. Sa akong nasayran kining grupoha nagsugod kaniadto og hakot sa mga construction worker sa dihang gitrabaho pa ang maong mall.
Wa pay laing grupo sa habal habal ang nagruta sa maong dapit niadtong panahona. Sa dihang nagsugod na og operate ang mall namungingi sa daghang grupo sa mga habal habal driver ang maong ruta.
Gawas sa umaabot nga libreng sakay ang grupo ni Jay nakapasiugda na sab og relief operations alang sa mga biktima sa katalagman.
Ang grupo nagtampo tampo og mga relief goods og giapod-apod ngadto sa mga biktima. Karong bag-o nagpahigayon sab sila og charity ride para sa usa nila ka kauban nga nagsakit. Kay di naman makabiyahe ilang gisuplayan og bugas.
Ang labing nindot nga ilang gihimo mao ang pagpangumpra og baligyaonon aron magtinda tinda lang una ang masakiton nilang kauban. Nindot ni nga panag-ingnan labi na ang libreng sakay sunod semana. Kudos sa SRP Motorjack Riders.