ANG mga kadagkoan sa Simbahan niingon nga ang Semana Santa panahon sa pagpamalandong, di sa bakasyon. Apan daghan ang nagpahimulos sa taas nga bakasyon ug nanguli sa ilang kalungsoran.
Daghan sab ang nagpanon sa kabaybayonan sa lain-laing mga dapit sa lalawigan sa Sugbo. Wa nila panumbalinga ang naglagiting nga kainit sa adlaw ug nagtimpasaw sa kadagatan. Ang nahadlok nga mapagtong, nagpalandong lang.
Apan kumusta man ang kaluwasan sa mga lokal ug langyaw nga turista nga miduaw sa mga kabaybayonan ug uban pang mga trourist attractions panahon sa Semana Santa? Gitubag kini sa paglusad sa mga tourist police units (TPUs).
***
Ang mga TPUs naumol niadtong 2010 ubos sa usa ka memorandum of understanding nga gipirmahan tali sa Department of Tourism (DoT) ug sa Philippine National Police. Gilusad gilayon ang labing unang 14 ka TPUs.
Gidugangan kini ug 24 ka mga TPUs sa mga lugar nga sagad hugpaan sa lokal ug langyaw nga mga turista. Lakip sa mga lugar nga dunay mga TPUs mao ang police office sa Puerto Princesa City ug sa Palawan, Lapu-Lapu City, Cebu City ug Cebu Province.
Ang mga TPU maoy gitahasan sa pagpatuman sa mga balaod ug ordinansa bahin sa pagpanalipod sa mga turista ug mga residente, kabtangan ug kalikopan ug sa pag-imbestigar sa mga kaso nga naglambigit sa mga turista, lokal man o langyaw.
***
Sa miaging Semana Santa, nikuyog ko sa usa ka dakong panon nga niadto sa usa ka gamay apan puting baybayon sa Tingko sa lungsod sa Alcoy sa habagatang bahin sa lalawigan sa Sugbo.
Akong nakita nga aktibo ang mga sakop sa TPU nga nadestino sa Tingko, Alcoy nga gipangulohan ni Master Sergeant Alexander Mendaros, sakop sa Alcoy Police Station Tourist Police Unit.
Nagtukaw sila bisan sa kagabhion, busa hapsay ang maong dapit bisan pa kon daghan ang mga tawo nga nibisita sa maong dapit. Manghinaut kita nga ang mga TPUs sa ubang mga dapit, sama kanila, aktibo sab.