DELEGASYON sa liboan ka mga batan-on ang gipaabot nga mangabot sa Sugbo karon gikan sa nagkalainlaing dapit sa nasod alang sa pagtambong sa National Youth Day (NYD) sa Simbahang Romano Katoliko nga magsugod ugma, Martes, Abril 23, ngadto sa Sabado, Abril 27. Welcome ug maayong ninyo sa pag-abot sa Sugbo.
Ang Archdiocese sa Sugbo maoy host sa panagtigom karong tuiga sa kabatan-on, kinsa kaugmaon sa simbahan. Sila ang sumosunod sa pagpalig-on sa pagtuo ug pagsangyaw sa ebanghilyo ni Kristo. Dili mahisama sa mga simbahan sa Uropa ug ubang bahin sa kasadpan nga karong panahona nagkalayo ang mga batan-on sa simbahan.
Makahuluganon usab ang pagpahigayon sa Sugbo sa naasoy nga tigom isip pagpangandam sa dakong kasaulogan sa ika-500 nga anibersaryo sa Kristiyanismo sa Pilipinas nga dinhi nagsugod sa dakbayan sa Sugbo, dihang nidunggo ang Galleon ni Ferdinand Magellan niadtong Marso 16, 1521 ug ang iyang giugbok ang unang krus sa Kristiyanismo sa Asya.
Mao kini ang makahuluganon sa landmark sa Magellan’s Cross nga naa duol sa laing importante sa kasaysayan sa pagtuo nga Basilica Minore del Santo Niño, gipuy-an sa imahen sa batang Hesus nga gidala sa mga Espanyol nga timaan sa pagkadani sa magtiayong lider sa mga lumad ngadto sa Kristiyanismo.
Gikan sa Sugbo, ang Kristiyanismo mikaylap ngadto sa ubang bahin sa nasod, labi na sa Manila nga nahimong sentro sa nasod sa pulitika ug simbahan. Nahimo ang Pilipinas nga unang Kristiyanong nasod sa Asya. Ikaduha ang bag-ong nasod sa East Timor. Tungod niini, ang Pilipinas tinubdan sa mga magsasangyaw sa Asya. Gani, duha na ka batan-ong Pinoy ang nahimong santo, San Lorenzo Ruiz ug San Pedro Calungsod.
Manghinaut kita sa malinawon, malampuson ug undanon ang panagtapok sa mga batan-on sa simbahan taliwala ning daghang hagit ug tentasyon sa kabag-ohan sa panahon.