LIMA ka mga sakyanan ang gi-impound sa Land Transportation Franchising and Regulatory Board (LTFRB) 7 kinsa nibiyahe nga walay walay prangkisa ug namasahero gawas sa ilang rota atol sa Semana Santa.
Si Regional Director Eduardo Montealto sa LTFRB 7 nagkanayon nga 3 ka mga utility vehicle nga gilangkuban sa duha ka van ug usa ka PUJ ang namasahero gawas sa ilang rota nga nalatid sa prangkisa ug laing usa nga way dokumento didto sa lungsod sa Lilio-an niadtong palm Sunday ug Lunes santo.
Nasakpan usab sa mga operatiba sa LTFRB ang usa ka multicab, van type sa Mandaue City nga namasahero kansang sakay mga langyaw niadtong Martes santo.
Gisusi sab nila ang north bus terminal habig nga nahimutang sa north reclamation area niadtong Holy Friday ug adunay usa ka bus nga namasahero apan nahabilin ang kopya sa franchise.
Laing tulo ka bus ang ilang na-apprehend didto sa Cebu South Bus Terminal nga adunay samang kalapasan diin nakamulta ang mga operator og tag P5,000
Ang pangulo sa LTFRB 7 nagkanayon nga ilang gihatagan og atensyon ang lungsod sa Lilo-an human sila nakadawat og mga report adunay mga colorum utility vehicles nga namasahero.
Ang 5 ka colorum vehicles anaa na karon sa impounding area sa Highway Patrol Group (HPG) 7 diin ang van malukat lang sa tag-iya kon makabayad sila og tag P200,000 ug tag P50,000 sa PUK ug multicab.
Si Montealto niawhag ngadto sa mga tag-iya og sakyanan sama sa van nga dili mosugal sa pagpamasahero bisan kon wala silay franchise sanglit naghuwat kanila ang dako nga multa inay iyang giawhag sa pagproceso sa mga dokumento para makakuha sila og prangkisa aron mahimong legal ang ilang pagpamasada. (B)