Todino: Pagkasunog ug iyang kasaysayan

NAGBANGUTAN ang simbahang Romano Katoliko sa tibuok kalibutan pagkaugdaw sa Notre Dame Cathedral sa Paris sa miaging semana.

Naila ang cathedral nga usa sa makasaysayon nga monyumento sa Katolisismo sa Europe ilabi na sa France.

Kapin sa walo ka siglo, ang cathedral mismo nabantog sa iyang adunahan sa kasaysayan gikan sa repormasiyon ngadto sa rebolusiyon sa gubat sa kalibutan.

Apan, ang wala gipasantop sa kadaghanan mao ang ngil-ad ug madugoon nga hitabo sa palibot sa maong bantogan nga simbahan.

Niadtong 16th century ang Katoliko sa France nag-atubang og kaguliyang tungod sa protestant reformation. Daghang mga maalamon ug ordinaryong molupyo nahigmata nga dili sila makabaton og kaluwasan diha sa relihiyusong kalihukan ug seremonyas nga gipasiugdahan sa simbahang Katoliko.

Nasabtan nila ang kamatuoran nga diha lamang ni Hesu-Kristo, pinaagi sa pagtuo niini uban sa gugma og pagkamatinumanon makaplagan ang tiunay nga kaluwasan.

Wala mahimuot ang liderato sa simbahan busa determinado sila sa paghipos niining mga tawo nga gitawag nila og ‘heretics’ nga nakakaplag sa kahayag diha ni Kristo.

Ang resulta, niadtong Agusto 24 ug 25, 1572 liboan ka mga tawo nga misupak sa pagtulon-an sa Katoliko ang gipang-ihaw. Nagbanaw ang dugo sa mga inosenting kalalaken-an, kababayen-an ug kabataan sa dalan niadtong higayona.

Ang dakong leksiyon dinhi mao nga dili kasegurohan ang kabantog ug kadako o kamakasaysayon sa monyumento nga molahutay kini.

Ug dili sab sabton nga tungod sa kabililhon ug pagkamakasaysayon sa usa ka edipisyo nga pulos nalang maanindot ang sugilanon niini.

Wala pay usa ka semana human sa sunog, mokapin na ngadto sa usa ka bilyones dolyanes ang nakolekta nga donasiyon aron itukod pagbalik ang Notre Dame Cathedral.

Nangusog ang simbahan nga makatigum og igong kantidad taliwa sa kamatuoran nga naghinobra ang bahandi ug bulawan niini sa Vatican.

Inay ipabarog ang cathedral pagbalik, angay unta maghinuklog nganong nahitabo ug nganong gitugot kining kalayo sa pagpapas sa maong edipisyo.

Sa tanang panghitabo dunay mensahi nga nagpahipi nga angay untang aninawon ug susihon aron magiyahan ang matag usa ngadto sa tiunay ug insaktong tumong sa kinabuhi.

Ang Kasulatan naghatag og giya aron masabtan sa tanan nga kining ‘kalayo’ nagsimbolo kana sa pagpahamtang og silot sa Dios ngadto sa katawhan nga wala magsunod sa iyang sugo ug katuyoan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph