KASONG kasupakan ubos sa Fair Election Act ang posibleng atubangon sa usa ka mayor sa lungsod sa Jasaan Misamis Oriental, human kini giwarningan sa buhatan sa Commission on Election (Comelec).
Kini human naimbestigahan sa buhatan sa Provincial Comelec nga si Mayor Julius Pagaspas ang daw wala nagtugot nga mag rally ang usa ka partido kon itandi sa kaatbang niini.
Basi sa tulo ka pahina nga resolution gikan sa Comelec, si Provincial elections supervisor Aleli Dayo-Ramirez niingon nga nakadawat sila og reklamo gikan sa partido sa PaDayon Pilipino nga girepresentahan ni Floramae Jo Abbu.
Kini kalabot sa buhatan sa mayor sa Jasaan nga nagdumili sa pag aprobar sa PaDayon Pilipino part nga magpahigayon og rally.
Nadawat kini sa buhatan nga reklamo niadtong Abril 10, hinungdan deretso kining gipaimbestigahan ni Ramirez pinaagi sa usa ka municipal elections officer nga mao si Lailani Nazi.
Sa pagsusi ni Nazi nadiskubreng ang buhatan sa mayor miaprobar og 29 ka adlaw sa team Unity nga magpahigayon og campaign rally kon itandi sa usa lamang ka adlaw ang gihatag sa partido PaDayon Pilipino nga kaatbang niini.
Tungod niini nasuta nga ang aksyon nga gihimo sa mayor usa ka dakong kasupakan sa section 32 sa Republic Act 9006, kon Fair Elections Act nga nag-ingon.
“The approving official shall give all candidates and parties equal and fair opportunity as to date, time and place, to hold public political meetings or rallies.”
Si Ramirez na mismo ang naghatag sa PaDayon Pilipino og walo ka adlaw nga pagpahigayon og handshaking ug campaign rallies sa munisipyo ngadto sa walo ka mga barangay.
Apan kung ang mayor mobabag pa niini nga mga adlawa ug petsa nagbahad ang Comelec nga gitakda kining mag-atubang og kaso kasupakan sa nalatid nga balaodnon.