NAKABSAN sa kinabuhi ang usa ka barangay kapitan human gibanhigan sa wala mailang suspetsado niadtong Dominggo, Abril 21 sa Pagkabanhaw sa Puntagorda, Barangay Hermano sa lungsod sa Balingasag, Misamis Oriental.
Si Claver Miral, Kapitan sa Brgy. Napaliran sa susamang lungsod, nakaangkon og lima ka mga samad pinusilan sa dughan ug laing parte sa lawas nga maoy hinungdan sa iyang kamatayon.
Sa inisyal nga imbestigasyon sa kapulisan, nasuta nga si Miral naimbitahan sa usa ka birthday party nga gipahigayon sa usa ka hotel sa lungsod sa Jasaan, ug pauli na sa Balingasag apan paghidangat sa Puntagorda giingong gitaparan kini sa motorsiklo nga sakay duha ka lalaki ug gipusil.
Girespondihan kini sa rescue team sa lungsod ug daling gidala sa balay tambalanan sa siyudad sa Cagayan de Oro, apan gideklarang dead on arrival.
Si Victorio Santua, kanhi Kagawad ug sinaligan sa nagpapiling mayor sa Balingasag nga si Alexis Quina, namahayag nga kung pulitika man gani ang motibo niini dili nila masuta.
Apan bisan iyang mga katawhan sa barangay walay nadungog nga kaaway ug gikabangi ni Miral.
Samtang ang kapikas ni Miral namahayag nga pulitika ang motibo niini.
Labihan ang dangoyngoy niini nga miigon nga unta mahatagan og hustisya ang kamatayon sa iyang bana.
Si Board Member Leonard Winstanley kinsa Association of Barangay Councils president niingon dili pa gyod siya makahatag ug reaksyon ug itugyan ang imbestigasyon sa kapulisan.
Malaumon kini nga unta dili na mahitabo susama niini ngadto sa mga barangay opisyal.
Si Board Member Prexy Elipe namahayag sab nga unta mapaspasan ang imbestigasyon ug mahatagan kasulbaran ang kamatayon niini.
Gipaabot sab niini iyang dakong pahasubo sa pamilya sa biktima.