NIDANGOP sa kapulisan ang trabahante sa usa ka gas station human gitulis alas 4 sa Dominggo sa kaadlawon, sa Barangay Kauswagan, siyudad sa Cagayan de Oro.
Matud ni John Michael Edralin, 19, minyo, ug trabahante sa gas station nga niabot ang usa ka lalaki dayon tuklod kaniya ug gisultihan nga dili ipalihok.
Nadala sa tulisan ang P8,000 nga kita, cellphone sa kompanya, bag ni Edralin nga dunay sulod P300 ug mga importanteng gamit ug mga Identification Card.
Ang suspetsado nagsul-ob og puti nga t-shirt, shortpants ug nagkalo kinsa dali nga nisakay sa pasaheroan nga dyip paingon sa wala matuking direksiyon.
Ang maong insidente ang nakatala na sa buhatan sa kapulisan ilabi na sa Police Station 4 sa Carmen alang sa dugang imbestigasiyon.