TULO ka batan-on gikan ug Daanbantayan, Cebu ang missing samtang usa ang naluwas sa pagkalunod sa usa ka motorbanca sa dihang napadpad sila sa Higatangan Island sa Biliran niadtong Dominggo sa hapon, Abril 21.
Matod ni Seaman Second Class Eljohn Ga sa Philippine Coast Guard (PCG) Eastern Visayas District, gikan sa Cebu ang maong motorbanca nga naay pangan nga "MBCA Aga" ug padung kini sa Higatangan Island sa Naval, probinsya sa Biliran.
Gahapon pa sa alas 5 nigikan sa Cebu ang motorbanca ug karong alas 2 sa hapon nadawat sa Coast Guard ang report.
Giila ang upat ka pasahero nga sila Jay Bohol, Danny Bohol, David Lastimada ug Daniel Cañezo, puros mga residente sa Barangay Carnaza, lungsod sa Daanbantayan.
Matud pa ni Tilano Dublin, panguo sa local disaster office sa Daanbantayan, nibyahe ang upat gikan sa Carnaza Island para mamista sa Higatangan Island.
Gikatahong nalunod ang ilang gamay nga motorbanca sa dihang naabot sila sa tunga-tunga sa isla sa Higatangan ug Maripepe sa lungsod sa Naval niadtong Dominggo sa gabii.
Si Jay ang unang nakit-an nga nag-utaw-utaw sa kadagatan sa dihang naay mga niagi nga mga mangigisda sa dapit kung asa nalunod ang ilang motorbanca.
Padayun gihapon ang search and rescue operation sa tulo ka kauban ni Jay. (dugang detalye gikan ni JKV)