NAILA ang Pilipinas nga maayo mogama og balaod apan iwit sa implementasyon.
Sa pagkatinuod, daghan kaayong balaod nga nakalimtan na sa katawhan o nagpabilin lang sa papel kay wala mapahimusli sa kadaghanan.
May balaod nga wala pa ma implementar apan gusto nang usbon o ilisan og laing susamang balaod.
Ang kasagarang problema sa implementasyon mao kuno ang kakulang sa pundo aron mahatagan og ngipon ug sundon.
Makapangutana kita nganong daghan pang modagan sa eleksiyon para sa lehislatora nga nangalata na man ang balaod?
Sulti sa mga eksperto sa balaod nga gikinahanglan gihapon sila tungod kay walay bisan usa ka piso nga mogawas gikan sa kaban sa gobyerno kung walay balaod nga ipasar sa konseho.
Sa niaging tuig ang usa sa pinakadako nga balaod nga gigama sa duha ka balay sa kongreso mao ang “General Appropriations Act” nga niadto lang Abril 15 nga gipirmahan ni Presidente Rody Duterte.
Ang nakalami pa kay may badyet siya nga gi-veto o wala tuguti.
Ang usa nga balaod nga wala masunod sa gobyernong lokal sa Davao mao ang Republic Act 10862 o ang gitawag nga “Nutrition and Dietetics Law of 2016.”
Giila sa estado ang papel sa mga rehistradong tig-atiman sa nutrisyon sa paglambo sa nasud ug kalamboan sa katawhan pinaagi sa hustong nutrisyon.
Ang mga nutritionists-dietitians maoy nagdumala sa hisgutanang nutrisyon ilabi na sa mga bata pinaagi sa Barangay Nutrition Scholars (BNS).
Sa pagkatinuod, hastang lisura ug kuti ang trabaho sa mga BNS kay sa ila gikan ang halos tanang datos sa panglawas sa kabataan sa 182 ka barangay sa Davao.
Kung ako ang pasultihon, mas kasaligan ang datos sa nutrisyon ug panglawas nga gikan sa BNS kung ikumpara sa ubang survey.
Gimando usab sa balaod nga butangan og rehistradong nutritionist ang mga plantilla posisyon nga gikinahanglan ang katakus sa nutritionist nga may hataas nga suweldo subay sa “Salary Standardization Act” sa gobyerno.
Apan bisan niadto pang 2016 napasar kining balaod, wala kini masunod sa lokal nga kagamhanan. Gihatagan gihapon og titulo nga “Nutrition Officer” ang rehistradong nutritionist bisan dugay na sila sa serbisyo imbis nga Nutritionist-Dietitian.
Adunay 15 ka rehistradong nutritionist sa 16 ka political districts sa siyudad ug sila tanan naghandom nga ma-implementar na ang maong balaod dinhi.
Atong nasayran nga hinayhinay nga gisunod kini sa ubang local government units sa Davao Region apil ang ubang ahensiya sa panglawas sa gobyerno nga gidumalahan sa Department of Health.
Hinuon aduna nay lakang ang City Hall nga lantawon kining maong isyu hasta ang pagdugang og nutritionist sa mga distrito.
Manghinaut kita nga adunay katumanan kining gihandom sa tig-atiman sa nutrisyon aron epektibo silang moserbisyo sa katawhan.