PIKIT, North Cotabato -- Personal nga atraso ang gituohan sa kapulisan nga motibo sa nahitabong pagpamanhig alas 2:05 sa hapon, Dominggo, Abril 21, nga nikalas og usa ka kinabuhi ug niangol og lain pang usa.
Napatay giila nga si Nasser Puntungan Amelil, 45, habal-habal drayber samtang ang naangol mao ang pasahero niini nga si Hadiguia Suliek Kansi, mga molupyo sa Barangay Nalapaan, Pikit.
Matud ni Pikit Chief of Police Major Mautin Pangandigan nga nahitabo ang pagpamanhig samtang sakay sila Amelil ug Kansi gikan sa palengke sa Pikit ug pauli na unta sa ilang gipuy-an sa Brgy. Nalapaan.
Nahitabo ang pagpamusil didto sa Barangay Batulawan sa lungsod sa duha ka wala mailhing suspek daplin sa kalsada.
Patay on the spot si Amelil nga naigo sa ulo ug nawong samtang gihatud ngadto sa Cruzado Medical Hospital si Kansi nga naigo sa paa.
Nagtuo ang mga awtoridad nga si Amelil ang tumong sa mga suspek apan nadamay lang si Kansi nga iyang pasahero.
Imbestigasyon sa kapulisan sa hitabo nagpadayon. (Edgar E. Fuerzas)