DIGOS CITY -- Kalit miulbo ang sunog sa ikaduhang karaang gambalay sa merkado publiko ning dakbayan, alas 4:30 sa kaadlawon Lunes, Abril 22.
Gipataas dayon sa Bureau of Fire Protection (BFP) ngadto sa Task Force Alpha ang alerto pasabot nga kinahanglang ipada sa lugar ang tanang fire trucks sa matag kalungsuran.
Sumala ni Police Major Jocelyn Grant, city fire marshal, nga paspas mikanit ang kalayo sa mga katapad nga stalls hinungdan nga naugdaw ang kapin kun kulang 20 ka mga puwesto.
Sagad sa mga baligya sa karaang merkado mao ang mga ukay-ukay, sari-sari store, sapatos ug uban pang produkto.
Banda alas 6:45 sa buntag, gideklara sa BFP nga kontrolado na ang sunog ug di na makahimo pagdako ang kalayo.
Sa pagsuwat ning balita Lunes, anaa pa sa lugar ang kabomberohan nga mihimo og overhauling aron mapawong ang mga baga nga naa sa fire site.
Di pa masulti sa BFP kon unsa ang tinubdan sa sunog ug pila ang damyos niini.
Apan mihimo na sila og makuting imbestigasyon sa nahitabo.
Samtang gitakdang i-turn over ngadto sa lokal nga gobyerno ang bag-ong gambalay nga ihulip sa nasunog nga laing gambalay sa merkado tulo ka tuig ang milabay.
Kini na ang ikatulong sunog sa merkado sa dakbayan human nasunog sab niadtong 2009 ug 2016. (Orlando B. Dinoy)