NAGHIMAS sa rehas nga bakal ang usa ka langyaw kinsa gidakop sa pulis kay nag-wild ug naghubo sa iyang brief sud sa usa ka convenience store sa Jose P. Laurel Avenue, Bajada Davao City, Dominggo sa kaadlawon.
Ang langyaw mao si Gareth (bansagon gitago) 50-anyos, American national ug temporaryo nga nagpuyo sa Bajada ning dakbayan.
Nasayran nga kaadlawon sa adlaw nga Dominggo, Abril 21, hubog nga miadto ang langyaw sa usa ka convenience store.
Pag-abot sa maong tindahan, kalit na lamang kining nag-wild ug alegasyong gipangguba ang istante hinungdan nangakatag ang mga baligya.
Gani, gipugngan pa niini ang cashier kinsa gustong mogawas gumikan sa kahadlok.
Sa maong takna, gihubo dayon sa langyaw ang iyang purol ug brief diin mibalandra sa mga kustomer ug mga staff sa tindahan ang kinatawo niini nga maoy hinungdan sa ilang kakurat.
Taud-taud, miabot ang kapulisan sa Sta. Ana Police Station dayon gipasakay sa mobile patrol ang langyaw ug gibalhog sa selda.
Naghulat ang kapulisan nga mopasaka og reklamo ang nasampit nga tindahan batok sa langyaw. (Richy F. Nalagon)