PATAY na nga nahidangat sa Southern Philippines Medical Center (SPMC) ang usa ka misis human brutal nga gidunggab sa iyang bana alas 11 sa gabii niadtong Biyernes Santo, Abril 19, sa Spring Valley, Buhangin, Davao City.
Ang biktima nailhang si Merlyn (bansagon gipatago) 38-anyos, vendor ug residente sa nasampit nga dapit samtang ang suspek mao ang iyang bana nga si Ponso, 39-anyos.
Si Police Corporal May Cheryll Yap, imbestigador sa Women and Children Protection Desk (WCPD) sa Buhangin Police Station, ang gilayong miresponde sa dapit.
Nasuta nga nianang mga alas 10 sa gabii, miapas ang biktima sa iyang bana nga nakig-inom sa iyang mga higala didto sa Maglana sa Spring Valley nga miresulta sa ilang away.
Dihang pag-uli nila sa ilang balay, misamot ang away sa mag-asawa atubangan sa ilang mga anak nga nasaksihan sa igsuong lalaki sa biktima nga si Jonel Timam.
Sa kapungot sa bana, mikuha kini’g kutsilyo dayon giayo’g dunggab sa dughan ug likod sa iyang asawa sa makadaghang higayon nga miresulta sa pagkahagba niini.
Gilayong gidala sa SPMC ang biktima apan pagka ala 1:28 sa kaadlawon, gideklara ni Dr. Larazabal nga namatay kini.
Hinuon ang suspek gilayong nasikop sa mga silingan ug gikustodiya sa Buhangin PNP.
Ang patay nga lawas sa biktima gipailawom sa autopsy samtang giandam na ang kaso nga ipasaka batok sa suspek didto sa korte.