HINGPIT nga giharos sa Boston Celtics ang Indiana Pacers sa Eastern Conference playoffs pinaagi sa pagkulit og 110-106 nga kadaugan sa Game 4 aron isira ang best-of-seven series, 4-0, sa National Basketball Association (NBA).
Si Gordon Hayward mipuga og 20 puntos sa unang 4-0 sweep nga kadaugan sa Boston sukad niadtong 2011 ug sa ikaduhang higayon sila maoy unang team nga nakasiguro og luna sa second round playoffs, butang nga nahimo usab sa maong prankisa niadtong 1986-87.
Ang 22 puntos ni Bojan Bogdanovic ug ang 21 ni Tyreke Evans sa Pacers wa mapakatabang sa Pacers nga masugamak sa ikaduhang higayon sulod sa tulo ka tuig nga sila ma-sweep sa best-ofl-seven playoffs.
Kini maoy ikapitong nagkutay nga kadaugan sa Celtics batok sa Indiana sa karon nga season.
Duha gyud ka higayon nga miarangkada gyud dayon ang Celtics ug daw sa padulong kini sa sayong kadaugan.
Apan ang Pacers wa mohurar gilayon nakahatag pa kini og saktong kombati ug nailog ang labaw sa halftime, 49-47.
Gani nainat pa kini ngadto sa 56-49 sa third quarter.
Apan sa panaghugpong nila ni Hayward ug Kyrie Irving, ang Boston hinayhinay nga misulpot u ang tres ni Hayward sa katapusang 4:24 sa duwa maoy mibingat sa 90-83 nga labaw.
Laing duha ka tres sa gihagsa sa uwahing res minutos ug didto naaninaw na nila ang kadaugan. Si Kyrie Irving milabnot og 14 puntos ug pito ka assists alang sa Boston.
Gilubong sa Toronto Raptors ang Orlando Magic, 107-85, aron pagbingat usab sa ilang bintaha sa playoffs, 3-1.
Si Kawhi Leonard mipakatapo og 34 puntos, samtang sila si Pascal Siakam ug Norman Powell mitampo og tag 16 puntos.
Ang 2014 NBA Finals MVP mipuga og 12 sa iyang 20 ka itsa ug modugang og unom ka rebounds sulod sa 35 minutes.
“It’s fun,” matod ni Leonard, kinsa wala makaduwa sa playoffs sa niaging season sa didto pa siya sa San Antonio tungod sa injury.
“This is what you play for all season long. And I’m just grateful to be out here on the floor again. I’m feeling good. It took a long time for me to get healthy but I’m happy with the way things are turning out now.” Dala ang 3-1 nga record, ang Raptors mahimong motapos sa serya didto sa ilang korte sa Toronto.
Mikamang usab paingon paduol ngadto sa semifinals playoffs ang defending champion Golden State Warriors human sa ilang 113-105, batok sa Los Angeles Clippers.
Si Kevin Durant mitapik og 33 puntos, Klay Thompson mipabaha og 32 aron inaton sa Warriors ang ilang labaw, 3-1.
Si Stephen Curry sayo nga na foul trouble sa ikaduhang sunodsunod nga duwa ug igo lang kining naka 12 puntos.
Na fouled out usab si Andrew Bogut human kini makakolekta og otso puntos ug 10ka rebounds.
“We came in with that mindset to put our foot on the throttle and not let go,” matod ni Thompson. “We let go in Game 2 and we won’t do that the rest of the playoffs. I really believe that.”
Namilegro nga makabakasyon og sayo usab ang Oklahoma City Thunder sa dihang giusban kini pagpukan sa Portland TrailBlazers, 111-98.
Ang Portland mao na karon ang nag-una sa series, 3-1, ug mahimong ilang tapuson kini sa Game 5 nga mobalik didto sa ilang korte. (JBM)