SECTIONS
Thursday, May 23, 2019
SUPERBALITA CEBU

Phoenix motabla sa series batok sa SMB

DUWA karon:

(Cuneta Astrodome)

7:00 pm. - Phoenix vs. San Miguel

Ang pagtabla sa series maoy anaa karon sa alimpatakan sa Phoenix Pulse sa dihang ilang ikasangka na usab ang defending champion San Miguel Beer sa Game 4 sa best-of-seven semifinals round nga motapon didto sa Cuneta Astrodome.

Ang Fuel Masters ni coach Louie Alas nakaipsot sa uwahing rally sa Beermen sa Game 3 niadtong Easter Sunday, 92-90, nga maoy naghatag kanila og lugway sa serya ug sa samang higayon malikayan ang 0-3 nga disbintaha.

Ang upat ka free throws ni Matthew Wright sa himatyong mga segundos maoy nahimo nilang gabay sa kadaugan bisag nakabaton kini og dakong pagpanghudlat sa nahabiling 15 segundos.

Si Wright mitapos sa duwa nga may 18 puntos, 12 niini sa fourth quarter lakip niini ang mga free throws, alang sa Phoenix.

Sa nahabiling 21 segundos, nakaposte og 92-88 nga labaw ang Fuel Masters, apan ang dinalian nga lusot ni Chris Ross maoy nakapasikit og maayo sa duwa, 90-92.

Dinhi gibati og kabalaka ang mga dumadapig sa habig sa Phoenix ilabi na sa pagkasipyat ni JC Intal sa iyang duha ka free throws.

Midap-ig pa gyud ang suwerte sa Fuel Masters human masipyat si Rose sa iyang tres ug ingon igo ra sab nga misimhot sa ring ang follow up shot ni Von Pessumal nga natukma usab sa pagkapupos sa oras.

Gidayeg ni coach Louie Alas ang kadasig nga gipakita sa iyang mga batos sa tibuok 48 minutos, sukwahi sa niagi nilang, 82-92 nga kapildihan diin permi silang naglabaw og 12 puntos apan napildi kini sa lahutay.

“Sabi ko nga, ‘Di tayo p’wedeng maglaro ng less than 48 minutes against San Miguel,” pagtug-an ni Alas sa Spin.ph. “At least kanina, hanggang sa last seconds nakaka-execute kami. Basically, ganito rin naman iyung second game. Nu’ng second game hindi lang kami naka-close out.”

Impresibo usab si Calvin Abueva kinsa milabni og 13 ka rebounds, ug lima ka assists, gawas sa iyang 18 puntos, nga igo na kaayong nakapahimo kaniya nga best player of the game.

Ang ubang Fuel Masters nga nakapugnit og double figures mao sila si Justin Chua mga may 15 puntos ug pito ka rebounds ug RJ Jazul nga mitapos sa duwa nga may 14 puntos.

Si June Mar Fajard kinsa wala maka score sa first quarter, mipaulbo og 22 puntos ug 19 ka rebounds, Alex Cabagnot mipupho og 18 samtang tagsatagsa nga mitipo og 16 puntos sila si Terrence Romeo ug Christian Standhardinger.

“Iyun ‘yung gusto namin, matapos sila ng less than 100 (points),” pasabot ni Alas. “Kapag lumagpas ng 100 super less na tsansa naming manalo.”

Mga puntos:

Phoenix (92) - Abueva 18, Wright 18, Chua 15, Jazul 14, Perkins 8, Intal 8, Kramer 5, Revilla 4, Mallari 2, Napoles 0, Mendoza 0, Dennison 0, Guevarra 0.

San Miguel (90) - Fajardo 22, Cabagnot 18, Romeo 16, Standhardinger 16, Ross 8, Pessumal 3, Santos 3, Rosser 2, Nabong 2, Zamar 0, Tubid 0.

Quarterscores: 21-19, 40-36, 64-66, 92-90. (JBM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!